KRALENDIJK – Djamars a tuma lugá konsagrashon di miembronan di Caritas. Awor por kuminsá e trabou ofisial di Caritas na Boneiru. Na e sede di Caritas na Kaya Papa Cornes a tuma lugá e Konsagrashon, kaminda mayoria miembro tabata presente. Huntu ku nan tabat’ei pader Vikario Santiago Malagon i pader Ivan Dario Perez Gomez.    

A inisiá parti ofisial kaminda Obisbu Luis Secco pa medio di telefon, el a komuniká ku esnan na Boneiru e na Kòrsou. “P’ami ta un momentu bunita pa por kompartí ku boso na Boneiru. Nos no por ta huntu personal debí na e pandemia di Coronavírùs.  

Pais Venezuela ta pasa den situashon fastioso i ta hopi importante loke nos ta hasi pa nos rumannan den nesesidat. Hopi biaha nan no tin kuminda pa sobrebibí. Éksito pa kontinuashon ku e bon obra”, Obispu Secco a bisa. Di e forma aki el a instalá Caritas di Boneiru. Pader Vikario Santiago a menshoná: “ Ora nos ta duna no spera nada. Dios ta manda pa nos. “ Ivan a papia i a splika ku Caritas ta amor. Kada parokia mester tin su organisashon enkabesá pa Caritas. Einan nos ta deseá pa yega.” A papia tambe sekretario Thirza Rojer, kende a presentá e miembronan i nan posishon den Caritas. El a laga skucha un grabashon di Marcia Haywood, kende ta kordinadó regional di Caritas Caribe. Ta trata di un grabashon di Marcia Haywood, kende ta na Sint Lucia.

Awor por kuminsá e trabou ofisial di Caritas na Boneiru.
Caritas a entrega un karta informá di nan mishon i vishon pa duna yudansa humanitario, ku e propósito pa duna un perspektiva nobo. Nan vishon ta pa establesé un organisashon nobo konfiabel ku ta forma parti riba mapa sosial di Boneiru. Awe djarason Obispu a aprobá e proposishon di e miembronan di Caritas i na Boneiru pa nan tarea. Riba potrèt algun di esnan ku tabata presente. 

Share This
error: Content is protected !!