Kralendijk – Den un karta dirigí na gezaghèber Edison Rijna, konsehal independiente Daisy Coffie di Frakshon Coffie ta skirbi ku ‘Washington Slagbaai National Park Bonaire’ ta konsistí di 2 parti, Washington i Slagbaai. Washington ta pertenesé na teritorio di Boneiru. Gobièrnu di Boneiru a duna STINAPA Boneiru esaki pa manehá. Slagbaai ta pertenesé na STINAPA N.A., lesa Carmabi. Carmabi a entregá Slagbaai na STINAPA Boneiru pa manehá esaki. E kabritunan den Washington ta pertenesé na herederonan di Sr. Herrera ku a bende e plantashi aki ku Gobièrnu di Boneiru. E kabritunan den Slagbaai ta pertenesé na STINAPA N.A. ku ta Carmabi. A negoshá pa Slagbaai bini bèk den poseshon di Boneiru. Carmabi ta dispuesto pa hasi esaki i a duna palabra pa Slagbaai bira bèk di Boneiru, pero bou di e kondishon ku mester saka e kabritunan for di Slagbaai. Den su karta sra Coffie ta referí solamente na e kabritunan den Slagbaai. Segun Daisy Coffie den transkurso di añanan STINAPA Boneiru a hasi diferente akshon pa por a kontrolá i/òf saka e kabritunan for di den e parke, spesialmente e parti di Slagbaai. Si e kantidat di kabritu bira muchu hopi esaki ta afektá e mondi ku ta e fuente di kuminda pa tur e bestianan ku tin den e parke. Konsekuensia ta ku e kabritu no tin sufisiente kuminda i e ta bira suak. Ku otro palabra e mondi i e kabritu ta sufri den un situashon kaminda tin muchu kabritu den e parke.

Basá riba e informashonnan aki Daisy Coffie den su karta ta hasi e siguiente preguntanan: Gobièrnu ta na altura di disponibilidat di STINAPA N.A./Carmabi pa pasa poseshon di Slagbaai bèk pa teritorio di Boneiru? Gobièrnu ta na altura ku un di e eksigensianan di STINAPA N.A./Carmabi ta pa saka e kabritunan for di Slagbaai? Si tin korespondensia riba e puntonan aki ta posibel ku nos di Konseho Insular por risibí esakinan? Gobièrnu ta di akuerdo ku ke saka e kabritunan for di Slagbaai? Gobièrnu ta di akuerdo pa wak e maneho di STINAPA Boneiru pa saka e kabritunan for di Slagbaai mas di aserka i evaluá esaki? Gobièrnu ta na haltura ku aktualmente den kuadro di saka e kabritunan for di Slagbaai ta tira esakinan mata? Gobièrnu ta di akuerdo pa averiguá serka STINAPA Boneiru mas detaye tokante e maneho aki? Nos tin informashon ku tin okashon kaminda ta tira kabritu i ta laga e kadaver bentá pa deskomponé den mondi. Gobièrnu ta na altura di e aktonan aki? Si esaki ta kuadra, Gobièrnu ta di akuerdo ku ta tira kabritu i laga e kadaver bentá den mondi? Gobièrnu ta di akuerdo ku esaki no ta un maneho responsabel si nos tene kuenta ku nos tin famianan ku ta biba den pobresa sin kuminda adekuá pa kome tur dia? Kiko Gobièrnu ta dispuesto pa hasi den tal kaso manera deskribí aki riba?

Share This
error: Content is protected !!