KRALENDIJK – Melvin Sint Jago hefe di servisio di inteligensia di KPCN i hefe di operashon di KMar di islanan BES Robert Snijder a papia tokante trafikashon i mal trato di hende riba Boneiru. Ayera 18 di òktober, tabata dia internashonal di trafikashon di hende. 

Trafikashon di hende ta: Trese hende den un forma ilegal na Boneiru, loke ta sosodé hopi entre otro for di Venezuela. E otro ta kon ta atendé ku hende riba e isla Boneiru, esaki den un forma inkorekto di nos leinan. E hende ta paga un kapitan di barku pa nan trese Boneiru ilegalmente. Tin diferente kaso di trafikashon di hende i mal uso kon atendé ku hende den entre otro konstrukshon. Aktualmente e ta sosodé hopi. E doño di trabou ta laga e trahadó traha bou di preis i traha hopi ora, loke no ta e forma korekto den nos leinan. Hopi biaha ta sosodé ku un hende ta bin di afó, e ta gana sèn i apesar ku e ta traha inkorekto pa loke ta trata nos leinan, e ta hasié i keda ketu, pasobra na su pais ta hopi mas pió. E ta traha aki i sobra sèn manda pa famia afó apesar di funshoná inkorekto. Hopi bia ta informá un hende den eksterior ku e ta bin Boneiru pa sierto trabou, sinembargo ora e yega aki kos ta totalmente diferente di loke el a spera. Esaki no solamente ta sosodé na Boneiru, tambe na Kòrsou i Aruba. Tin hende ta yega Boneiru no sa unda e mester bai i tampoko ken ta bin busk’é. Tur esaki ta loke nos ta topa kuné i mester atendé. Ta hopi importante pa informá polis momentu ku tuma nota ku tin sierto kos ku no ta korekto, pa loke ta trata kon atendé ku hende. E situashon ta di atenshon mirando e kantidat di hende ku ta biba aki, tin hopi kaso ta aktivo.  

E víktima hopi bia mester di atenshon i pa yud’é pa e por ta stabil i kontinuá, sea e tin ku regresá su pais òf atendé su papelnan pa e por ta legal. Polis, Kmar, Duana i Gobièrnu, nos tu tin ku atendé diferente situashon. 

Na Boneiru tin poko kaso di hende ku ta drenta via laman ilegalmente. E ta minimal sigur kompará ku Kòrsou i Aruba.   

Number di tep ta: 717-7251, i ta keda anónimo pa kualke situashon ku un hende tuma nota di dje i informá nos. 24 ora pa dia por yama e number. Esaki ta number pa kualke kos inkorekto ku ta tuma lugá pa loke ta trata atendé ku hende, sea maltrato òf mas. Entre otro tin biaha trahadónan den konstrukshon ta drumi den kònteiner i no tin kontakto ku hende simplemente su trabou i kla. Ta trahando riba foyeto i pronto ta publiká esaki ya e hende ta mira den komunidat kiko ta inkorekto pa por informá esnan konserní, pa aktua kaminda tin kos inkorekto. Por yama pa Ayudo di víktima na Boneiru: 717-6181. Trafikashon di hende ta sosodé tur parti di mundu. Ta trata di algu hopi amplio. Ta importante pa koperashon di komunidat pa yuda stroba e akto menshoná, nan a bisa.  

Share This
error: Content is protected !!