KRALENDIJK – E sifranan di delaster tempu ta indika ku e kantidat di tèst ku resultado positivo ta bahando. For di djabièrnè 2 siman pasá no tabatin kaso nobo di CoViD-19. Pues kos ta bayendo den bon direkshon. Sinembargo ta muchu tempran pa nos saka konklushon. Esaki ta loke Dr. Marian Luinstra-Passchier a menshoná resientemente. “2 Siman pasá sinku i seis di òktober, nos a haña ainda un total di 14 resultado di tèst positivo. Ta parse ku ta hopi tempu pasá. Sinembargo ta despues di algun tempu numa nos ta bin sa, si hende den serkania di esnan infektá a bira malu. E hendenan ku resultado di tèst positivo a bai mesora den isolashon. Nos no sa di tur e hendenan akí ta ken a pega nan ku e vírùs. E fuentenan deskonosí akí por a pega otro hende tambe ku e vírùs. I no a tèst e otro hendenan akí. P’esei ta importante pa warda un tiki mas. Pa wak si e kasonan di siman pasá ta resultá den mas hende ku a pega ku e vírùs. 

Gustosamente mi kier duna mas detaye di loke nos sa awor. Na promé lugá di e sitionan kaminda nos sa ku hende a pega ku e vírùs. Tin ménos kaso di hende ku a pega ku e vírùs na trabou. Esta si nos kompará esaki ku e tempu promé. Na kas tin kaso ainda di vários hende ku ta pega ku e vírùs. Hende ku a pega promé ku e vírùs pafó di kas, ta pega hende na kas. Pues pa protehé bo sernan kerí, bo mester tene bo mes na e reglanan. Siguir ora bo ta pafó di kas. Atrobe no tabatin kaso di hende ku a pega ku e vírùs na skol òf den hóreka.

Tin un kambio tambe si nos wak edat di hende ku a pega ku e vírùs. Kompará ku dos siman pasá, awor tin mas hende di binti te kuarenta aña ku a pega ku e vírùs. Te ainda tin tiki kaso di mucha i grandinan ku a pega ku vírùs. Esaki ta algu positivo.

Finalmente nos ta mira ku tin hopi ménos hende a bai tèst den e siman tras di lomba. Esaki por tin bários motibu. Kisas tin ménos hende ku keho. Tòg nos ta haña señal ku no ta tur ora hende ke bai tèst. Pasobra e ora ei nan mester keda kas i warda e resultado. Òf pasobra nan tin miedu ku hende ta haña sa ku resultado di nan tèst tabata positivo. Mi kier pidi atrobe pa bo bai tèst si bo tin keho. Pa bo protehá bo mes i bo sernan kerí. Mi kier pidi tambe pa boso sostené otro. No husga un hende, si den pasado resultado di su tèst tabata positivo. Si durante 24 ora largu un hende no tin keho mas, ke men ku el a rekuperá. E ora ei nos ta sigur ku e hende ei no por pega otro hende ku e vírùs di corona. E ora ei no tin ningun motibu pa kore pa e hende ei.

Huntu nos tur ta responsabel pa dominá COVID-19 mas tantu ku ta posibel. Awèl laga nos hasie”, Marian Luinstra-Passchier a bisa.

Share This
error: Content is protected !!