KRALENDIJK – Na komienso di siman por a skucha un komunikado di prensa ku ta papia di e situashon di kabritunan den Parke Washington Slaagbaai i ku un seri di pregunta na gobièrnu. Esaki ta prekupashon di konsehal independiente Daisy Coffie, pa e forma kon STINAPA ta atendé ku tiramentu di kabritu den parke Washington-Slaagbaai i ta puntra tokante e pèrmitnan konserní pa tira kabritu i dikon no ta hunta e kabritunan, hiba nan matadero i usa nan komo alimento pa nos hendenan. Tambe el a menshoná ku ta mata kabritu riba e tereno i laga e bestia tirá na na suela, i segun tempu e mes ta kaba na nada. Segun informashon tiramentu di kabritu ta tuma lugá ora ku tin bishitante den e parke i ta indiká esaki ku un bandera kòrá anto ku e bishitante ta drenta riba propio riesgo den parke. E komunikado di konsehal Coffie a haña bastante atenshon di suidadanonan ku tambe a trese nan prekupashon i diferente pregunta relashoná ku e situashon.

Relashoná ku esaki, STINAPA ta bai tin un seshon ‘Live’ riba nan página di Facebook ‘STINAPA Bonaire’ djaweps 22 di òktober pa 6’or di atardi. Durante e seshon ta bai duna un splikashon, kiko realmente ta sosodé na Parke Washington Slaagbaai. Ta bai splika tokante matamentu di kabritu i na ken e kabritu nan ta pertenesé i hopi mas. STINAPA ta invita tur suidadano pa sigui e ‘Live Streaming’ djaweps atardi i tin oportunidat pa hasi pregunta i nos ta kontesta mesora.

Share This
error: Content is protected !!