******IMÁGEN DI SATELIT I DI RADAR TA MUSTRA UN ÁREA DI MAL TEMPU KU POR TA UN MENASÁ PA SIERTO PARTI DI KÒRSOU I BONEIRU******

SERVISIO METEOROLÓGIKO KÒRSOU TA ANTISIPÁ:
Áwaseru fuerte ku por kousa inundashon i/òf derumbe di tera i baranka na sierto parti di nos isla;
Ráfaga di bientu por kousa lokalmente sierto destrukshon riba su ruta;
Welek por kai i kousa daño na aparatura i otro opheto.

MEDIDA DI PREKOUSHON:

Saka stèker di aparatonan elektróniko afó i no hasi uso di esakinan durante di un evento di welek ku bos;
Usa telefòn ku waya solamente den kaso di emergensia;
Mara ophetonan ku ta lòs pafó i pone bo mes i bo bestianan di kas den seguridat;
No usa palunan aislá pa skonde;
No pasa dor di kayanan òf áreanan ku ta inundá, òf kaminda ku tin roi grandi ta kuri;
Sali for di boto i alehá bo mes for di awa, si esei ta posibel;

DEFINISHONNAN:

Un Boletin Spesial ta ser emití pa eventonan di wer ku ta kousa inkonbeniensia general òf preokupashon den pueblo (ku ta rekerí atenshon i akshon di outoridatnan di brantwer i polis) i ku no por ser deskribí na un manera adekuá den un pronóstiko di tempu regular.

Un Vigilansia pa Mal Tempu ta un anunsio pa ora ku mal tempu ta posibel (probabilidat di 30 pa 50%) denter di próksimo 3 pa 12 oranan.

E frase ku ta kuminsá ku E KONDISHONNAN AKI LO DURA FOR ta duna un aproksimashon di e periodo di durashon di e kondishonnan di peliger.

KEDA PENDIENTE PA MAS INFORMASHON

Share This
error: Content is protected !!