KRALENDIJK – Raimy Ellis, doño di e boto ‘Opportunity’ ku ta mará den Harbour Village Marina a papia tokante e situashon fastioso ku tin na Jachthaven ya pa algun aña kaba. Ta trata di e situashon kaminda na momentu ku nivel di laman subi, e awa salu di laman ta subi Bulevar Gobernador N. Debrot na altura di Jachthaven. “No ta nada nobo. Ya ta konosí pa tur hende tokante e asuntu di awa salu na e sitio menshoná, i resientemente a traha un kaminda di tera, ku e meta pa un temporada, te momentu yega na un solushon permanente. E problema ta ku ta trata di awa salu i si pasa ku outo den esaki, e tin su konsekuensianan. E kaminda di tera ta solushoná e asuntu ku outonan ku ta pasa den awa salu, pero na otro banda, boto i yatenan den Jachthaven ta kambia di koló, debí na e stòf ku ta lanta kaminda e outonan ta pasa riba e kaminda temporal. Kada dos dia mi mester bai na e boto pa laba esaki pasobra e ta tur na tera. Mi boto blanku, no ta blanku mas. I no ta ami so, sinembargo mas doño di boto ta eksperensiá e problema. Esaki sigur ta bai krea un suma haltu di debe pa paga, usando e kantidat di awa pa laba e boto ku regularidat huntu ku e suma haltu ku mester paga pa e boto tur luna. Nos no a pidi pa esaki.

Diputado James Kroon kende pa hopi aña ta diputado, kende ta atendé ku entre otro asuntunan di kaminda, pa medio di mi ruman Edison Ellis ku ta miembro di Konseho Insular, mi a bisé pa pidi pa atendé e situashon. Edison Ellis a papia ku diputado Kroon loke ami a pidié, i komo kontesta diputado Kroon a bis’é: Nos ta bezig pa remediá e situashon permanente. ”E palabra bezig tin mi kansa! Por solushoná e situashon rápido usando santu òf granson, evitá ku stòf ta lanta. Otro kos, no tabata nesesario pa a traha un kaminda na banda. Por a simplemente pone santu pegá ku e kurá kaminda e awa ta drenta i subi riba kaminda, i ta kla. E asuntu di nan ta bezig lo no finalisá por lo pronto. Aña lo bòltu i nada. Mi ta spera e otro doñonan di boto ku a papia ku ami, tambe sali i papia pa yega na un solushon. Mi a purba drenta den kontakto ku gezaghèber Edison Rijna i no a logra hañ’é. E asuntu aki ta un sufrimentu pa e pueblo. Mester hasi algu pa solushoná e asuntu”, Reimy Ellis a bisa.   

Share This
error: Content is protected !!