Kralendijk – Djarason 21 di òktober, gezaghèber Edison Rijna, a dirigí palabra na prensa i komunidat engeneral loke tabata palabrá for di siman pasa, relashoná ku desaroyonan rondó di COVID-19 riba nos isla.  

“Mi ta kuminsá awe ku bon notisia, menshonando ku awe ta e di 13 dia ku a pasa, i no tabatin ningun kaso nobo di COVID-19 na Boneiru. Mi ta hopi kontentu ku e logro. Pa mi esaki ta prueba, ku si nos tur uni forsa i kumpli ku e reglanan di higiena i distansia sosial, nos por frena plamamentu di e vírùs riba nos isla. Esaki ta nifiká tambe ku awor ta ora pa; paso pa paso nos kuminsá adaptá i òf suavisá e reglanan ku ta na vigor aktualmente. Manera por ehèmpel e reglanan pa pasahero ku ke biaha di Hulanda òf Kòrsou bini Boneiru. Meskos e reglanan ku tabata konta pa nos aki na Boneiru.    

Awor nos por puntra, dikon esaki mester bai paso pa paso? E kontesta ta pasombra nos sa unda nos ke bai. Nos ke mantené e situashon kaminda nos tin tiki kaso di hende ku a pega ku e vírùs. Nos ke ta den un situashon kaminda nos por kontrolá i manehá e kantidat di kasonan di COVID-19. Ta p’esei nos no ta bai kambia tur kos den un tiru i na grandi. Loke nos ta bai hasi ta trese poko poko algun kambio i wak kon esei ta bai resultá den práktika. Nos mester tene kuenta tambe kon situashon di COVID-19 ta desaroyá den e Paisnan for di kual normal tin basta pasahero ta bini Boneiru. Periódikamente nos lo wak kon kosnan ta kanando promé ku nos bini ku mas kambio.  

Mi ke pidi tur hende pa ta konsiente ku nos lo por sigui suavisá e medidanan solamente si nos sigui kumpli. Esta kumpli ku e reglanan di higiena, tosa i nister den bo èlebog, mantené distansia sosial di 1,5 meter. I evitá pa ta den grupo grandi di hende. Ta asina so nos por sigui lucha kontra e vírùs di Corona. Mi ta konta ku boso tur. Protehá bo mes i bo ser nan kerí. Huntu nos por. Huntu nos ta logra kontra Corona. 

Promé ku mi finalisá mi ke bisa lo siguiente. Si tin algu ku nos a siña den e lunanan ku ta tras di lomba, esei ta ku nos ta bon prepará pa atendé ku e situashon di krísis. Nos a pasa den tempu kaminda tabatin basta hende ku a pega ku e vírùs. Tur esei nos a sa di superá. Danki pa boso koperashon ounke tin biaha kisas no tabata fásil pa kumpli ku e reglanan.  

Share This
error: Content is protected !!