KRALENDIJK – Gezaghèber Edison Rijna a papia tokante e situashon di tempu ku resientemente a sorprendé entre otro doño nan di boto. El a bisa ku esnan ku tin boto tambe tin responsabilidat. 

“Último dianan sigur na tres okashon, Boneiru a hañ’é ku bientu for di direkshon sùitwèst, loke ta pèrkurá pa laman brutu. Esaki a pèrkurá pa algun doño di boto, ku nan boto a keda poko lástima pa e forma ku laman a bira. E bon ta ku solamente tabatin daño material. Niun hende no a keda lastimá pa motibu di mal tempu. Loke mi ke menshoná, ku nos na Boneiru, spesialmente esnan ku tin boto, ta dependé di e departamentu di meteo di KNMI situá na Hulanda, pa informá momentu ku tin situashon nan di tempu ku ta di atenshon, entre otro sùitwèst. Nos komo Boneiru ta trahando pa yega na un forma ku e informashon por yega Boneiru mas rápido ku ta e kaso aktualmente. Esaki ta notabel ku e islanan besiña, tambe ta risibí informashon momentu ku no ta hopi promé, ku e situashon di mal tempu ta presentá serka nan. Tin atenshon pa e situashon i ta trahando duru pa por establesé un forma pa informá no solamente Boneiru, sino Aruba i Kòrsou tambe ku informashon di tempu, spesialmente mal tempu. Di otro banda mi ta hasi un apelashon pa esnan ku ta doño di un boto òf kualke propiedat riba awa; nan tambe tin un responsabilidat.

Manera nos tur sa na komienso di e periodo di mal tempu, semper ta manda un anunsio, informando ku nos ta drenta temporada di orkan i ku bientu por bira for di direkshon sùitwèst, i mester ta atento pa kualke situashon. Esaki spesialmente pa esnan ku tin algu riba laman manera un boto òf na kosta. Kada hende tuma nan responsabilidat, ta bo boto i pèrkurá pe pa bo no haña bo ku sorpresa. Un mal tempu, algu di loke a sosodé resientemente, no ta tur bia e ta duna oportunidat pa avisá. A presentá entre otro un di e situashonnan, kaminda mardugá, pa ta eksakto 2:30, e informashon a drenta. Na e momentu ei no tabatin niun hende lanta pa por a aktua i evitá ku boto nan ta risibí daño. Na havenkantoor nan a krea un lista di tur hende ku tin boto, pa asina nan por tuma kontakto ku tur esnan riba e lista ku tin boto, pa informá nan di kualke situashon di entre otro mal tempu ku ta bin den direkshon di Boneiru. Ta bon pa tur hende ku tin un boto, tuma kontakto ku havenkantoor pa asina nan nòmber i number di telefon ta riba e lista pa nan risibí informashon momentu ta nesesario”,gezaghèber Rijna a bisa.

Share This
error: Content is protected !!