KRALENDIJK – Hulanda awe a marka un kantidat rèkòrt di 10.007 hende, ku a tèst positivo pa Coronavírùs (CoViD-19) riba un solo dia. Esaki ta un rèkòrt nobo ku Hulanda a kibra, siendo durante dianan tras di lomba ya e situashon tabata alarmante. Rijksinstituut voor Volksgezondheid en Milieu (RIVM) ta konfirmá ku esaki ta 726 kaso mas ku ayera. E kasonan ta oumentando drastikamente pa dia i den e dianan tras di lomba tabatin un kantidat di 7 pa 8 mil hende ta tèst positivo pa CoViD-19. Ku e situashon aki Hulanda ta posishoná su mes komo un di e paisnan di riesgo haltu den Europa, pa loke ta trata hende kontaminá ku e vírùs menshoná. Esaki no ta nifiká ku e vírùs ta pega mas lihé. Simplemente ta hasiendo mas tèst pa dia. 2073 persona ta hòspitalisá di kual 472 ta den ‘intensive care’. Segun sifra di RIVM, ayera tabata tin 47 pashènt ku a fayesé debí ku nan ta infektá ku CoViD-19, miéntras ku den e último 7 dianan a registrá 37 morto kontra di 24 morto den e siman anterior. Mayoria di e kontagio nan ta na Amsterdam, Rotterdam i Den Haag. Ta importante pa komunidat di Boneiru ta na altura di e situashon, ya ku algun bia pa siman, tin hende ta yega e isla aki for di Hulanda.   

Share This
error: Content is protected !!