KRALENDIJK – Tin indikashon ku porfin idioma papiamentu ta bai haña rekonosementu komo idioma kompletu. Esaki despues ku minister di asuntu nan interno i relashonnan di Reino di BZK, Kajsa Ollongren, a komprometé su mes den Tweede Kamer, ku el a hasi tur esfuerso pa wak den kua forma por logra esaki mas mihó. E minister mes ta pensa pa wak kon por logra esaki pa medio di un kombenio. El a bisa ku e ta trahando riba dje i tin hopi gana di logr’é. Kontestando preguntanan di miembronan Nevin Özütok di GroenLinks i Attje Kuiken di PvdA, durante tratamentu di presupuesto di e ministerio di BZK pa 2021, a toka e tema aki. Parlamentario Özütok a puntra e mandatario si e ta dispuesto pa laga hasi un investigashon, si papiamentu por bira un idioma kompletu. Kuiken na su turno a mustra riba e echo ku e ta haña idioma papiamentu importante. Esaki kontrali na Limburgsch i Fries sí. Segun Kuiken idioma papiamentu tantu komo idioma i kultura ta hopi importante. E ta deseá pa kua motibu ta hasi e distinshon i ta hasi un apelashon pa hasi algu kontra esaki. Minister Ollongren ta menshoná ku e ta haña e idea i deseo di ámbos miembro di Tweede Kamer hopi positivo.  E tambe ta deseá pa protehá i stimulá idioma papiamentu. Segun e mandatario e ta den kombersashon ku entidat públiko di Boneiru, i e organisashonnan tokante esaki. E ta mustra ku den debatenan anterior a mustra ku e karta Europeo pa idiomanan regional i idioma di minoria ku ta rekonosé Limburgsch i Fries, no ta konta pa e teritorionan ultramar. Esaki ta konta solamente pa Europa. Pues mester bai wak kon ta protehá idioma papiamentu mas mihó. E minister ta pensa den kua forma, kisas den forma di un kombenio òf algu por estilo pa por hasi esei. E minister a primintí di tene Tweede Kamer por eskrito na altura di e progreso den esaki.   

Share This
error: Content is protected !!