KRALENDIJK – Debí na problema ku awa salu ta subi kaminda na altura di Jachthaven, ta bai konstruí un brùg pa eliminá e problema. Diputado James Kroon, enkargá ku direktorado di R&O, Espasio i Desaroyo, a menshoná ku ta bai atendé ku e problema na altura di Jachthaven. Konstantemente outomobilistanan ta reklamá tokante e situashon na Bulevar Gobernador (Colá) Debrot, debí ku awa salu ta subi riba kaminda, prosedente for di laman. E proseso ta kanando, e asina yamá ‘bestek’-nan, e pakete di kondishon tékniko, bou di kua mester bai ehekutá e proyekto. Debí ku e situashon a bira di tal forma ku e awa di laman ta subi kaminda ku mas regularidat, a opta pa traha un kaminda di tera temporal, ku ta pasa na banda di esun di asfalt. Esaki a solushoná e situashon kaminda outonan ta pasa den e awa salu, sinembargo ta kousa otro problema. Debí ku e outo nan ta pasa riba e kaminda temporal di tera, nan ta lanta hopi stof i esaki ta resultá riba e boto nan den Jachthaven, kousando otro molèster. Pues ta nesesario pa yega na un solushon permanente i rápido. Ta un kaminda hopi usa na e sitio menshoná. Diputado James Kroon a bisa ku ta bai konstruí un brùg na e sitio i e plan ta pa den futuro hasié posibel pa boto nan por pasa pa medio di Jachthaven i bai den e saliña parti pariba di kaminda, pa pone e boto nan aya, sin mester tin miedu ku laman por lanta anochi i hasi daño na nan propiedat. E direktorado di R&O ta guiando e prosedura. 

Share This
error: Content is protected !!