KRALENDIJK – Rachel Isabella Saragoza un mucha di apénas 10 aña, tin un amor i pashon enorme pa pintamentu. Rachel a konta ku semper, for di momentu ku el a haña tinu manera ta bisa, e tabatin pashon pa pintamentu. “Tempu mi a kuminsá bai skol semper mi ta gusta pinta. Meskos tabata e kaso na kas. Promé mi tabata pinta ku pòtlot, i despues mi a kuminsá ku pènsel i fèrf riba blachi i awor riba kanfas.  

Mi tin mas o ménos 1 aña ta pinta pintura den su totalidat. Esta un kas, solo, mata i tur e detayenan.  

Mi inspirashon pa pinta algu ta bin for di loke ku mi mira, sinembargo tambe imaginashon. Bob Ross a motivámi mas, momentu ku mi a tuma nota di su pinturanan. E idea ta p’ami pinta mas pintura, i porta pone nan na un sitio i bende nan i desaroyá mi talento. Mi tin un deseo pa haña un hende ku lo por yudami guiami pa mi haña mas konosementu di pintamentu. Mi ta pensa i deseá pa dia mi bira un hende mayor di edat, p’ami ta un diseñadó di paña”, Rachel Saragoza a bisa.      

Si tin kualke persona ku ta deseá pa yuda Rachel Saragoza, pa e kontinuá i desaroyá e talento ku e tin pa pintamentu, por tuma kontakto na number di telefon 700-3771.Riba potrèt Rachel Saragoza i algun di su obranan.

 

Share This
error: Content is protected !!