KRALENDIJK – Covid -19 a kambia mundu kompletu i no por bai bèk mas na e bida ku nos a kustumá kuné. Den e situashon nobo, ku post-normal, ta lógiko ku mester bini kambio unda ta kuminsá pensa kiko e pandemia aki ta nifiká pa Bonaire. Covid 19 no ta bai mas for di Bonaire. El a bini pa keda i ta trese un kambio den mentalidat di hende. Esaki Arthur Sealy ta trese dilanti den un komunikado.

E plataforma unda e kambio tin ku tuma lugá ta enseñansa. Esaki ta nifiká ku enseñansa mester trata problemanan ku ta asotá mundu manera: desempleo, pobresa, kambio di klima, skarsedat di awa, diskriminashon, desigualdat, malesa, polítika ekonomia i splika ken ta Greta Thunberg ku a bisa : “Pakiko mi tin ku bai skol si no tin futuro p’ami”.

Pues un kambio riguroso di kuríkulo. Un skol di futuro. Bonaire mester di maestronan kritiko ku ta duna lès ku e meta kua direkshon e mundu ta bayendo i kon Bonaire ta kuadra den e direkshon aki.

Skol mester ta un kas di siñamentu i no un kampo di tortura. Un punto ku sigur mester abolí na enseñansa, spesial den esun primario, ta e maldita trahamentu di tarea di kas. (Huiswerk) Esaki ta e maltrato mas severo pa alumno i mayor. Mucha mester hunga. Kon ta posibel ku ta duna lès i ta pusha e mucha ku bòshi papel pa e hasi tarea na kas.

Mucha ta drumi spantá, lanta disgustá, sin gana di bai skol pa mira yùfrou òf mener rabiá pa motibu ke no a hasi su tarea i otro si a hasi tarea di kas. E mester soportá i aseptá ku e ta bobo, slow, atrasá. Mucha na yoramentu, ta plama e mucha for di otro i dun’é un kompleho.Un diskriminashon total kontra tur regla pedagógiko i didáktiko. Otro abuso ta dunamentu di “bijles” i “huiswerkbegeleiding”. Ta gastamentu di plaka i abuso. Skol mester ta un sitio di enkuentro ku otro mucha, un sitio unda e alumno ta bai ku smak, ta motivá, kontentu i siña.

Laga nos kuminsá ku un limpiesa total i pone “Bestuursakkoord, Masterplan, Plan Turismo i mas di kosnan bunita ei un banda, preferibel na lèntfil. Bonaire ku e koalishon MPB/UPB ta manera Titanic ku a kuminsá senk i e orkesta a sigui toka “Grandi Bo Ta”.

Share This
error: Content is protected !!