KRALENDIJK – Muchanan ku problema di kondukta òf hèndikèp múltiple, no por akudí niun kaminda na Boneiru pa un estudio spesial, loke nan tin derecho riba dje. E problemátika ta grandi. Sabyde Bies, direktor di Stichting Openbaar Onderwijs Bonaire, ta enfatisá ku ta preokupante, ku tin un grupo di mucha ku no ta hañando atenshon. Hopi mayor ku ta bini Boneiru for di Hulanda, ta skohe pa duna enseñansa na kas, sin pidi dispensashon ofisial. Es ku por paga, por akudí pa enseñansa spesial serka e skol privá ‘Het Koraal’. Vera Dohmen, kende a inisiá ku e skol, a bisa ku hopi mucha ku tin mester di algu èkstra den enseñansa, skolnan no ta ofresé esaki. Den e lei aktual tin pará ku riba e isla ta duna enseñansa inklusivo. Esaki ta nifiká ku kada mucha mester haña lugá na un skol regular. Boneiru tin un skol básiko públiko pa mucha ku difikultat òf hopi difikultat pa siña. Sinembargo, muchanan ku sí por siña, pero pa un òf otro motibu, entre otro problema di kondukta, no por bai un skol normal. Kasi no tin skol spesial. Sohaima M., ta mama di un mucha muhé di shete aña di edat, ku problema di kondukta. Pa motibu ku no tin un lei di enseñansa spesial, Sohaima ta tene su yu na kas. E mama a konta ku diripiente kos a bai inkorekto ku e yu na un skol regular. Sohaima i su yu no tabata felis, i kasimente no tin alternativa, esaki debí ku no tin un lei di enseñansa spesial. E yu di Sohaima, tin un IQ normal, sinembargo den un klas grandi e stimulashon ta di mas pe. E skol a purba pa duna guia spesial pa e mucha, sinembargo no a logra pa éksito. Tin posibilidat pa e yu bai skol priva, sinembargo e mama a bisa ku e no por kubri e gastunan. Diputado Nina den Heyer a bisa ku enseñansa spesial ta kai bou di gobièrnu di Reino Hulandes i ta trahando riba un solushon. Diputado Nina den Heyer a bisa ku tin sufisiente atenshon pa e problemanan di enseñansa spesial i kasi tur alumno di edat eskolar obligatorio, ta konosí serka ámtenar di enseñansa obligatorio. Na 2017 inspekshon di enseñansa hulandes ta mèldu bon notisia tokante kontinuashon di enseñansa regular. E parti di enseñansa spesial mester di hopi mas.     

Share This
error: Content is protected !!