KRALENDIJK – “Momentu ku bo ta purba hasi bo trabou mihó posibel, bo ta haña hende ta trese kos nan straño den publisidat. Mi no a duna òrdu pa limpia tereno den Rincon!”, diputado Pablo James Kroon a bisa.

”Tin un tereno na Rincon ku resientemente nan a hasié limpi, i ta hopi komentario tabata sirkulá rondó di e asuntu menshoná. Mi tabata presentá e tempu aya momentu ku nan a bèl e ámtenar ku tabata enkargá ku entre otro asuntunan di e tereno.  Sinembargo mi persona no a duna niun òrdu pa hasi e tereno limpi. E asuntu aki a kue un buèlta largu, kaminda a atendé ku e eks direktor di e tempu aya,  i a papia ku mi tokante e investigashon ku tabata tumando lugá, i ami a konta nan loke a sosodé. E asuntu ta kla i tur loke a sosodé a keda atendé. Ta imposibel ku ta desishonnan di gobièrnu, i kos pa FKPD, kaminda ta trese yen kos inkorekto dilanti.  Tin algun grupo ku ta deseá pa hasi diferente kos den Rincon. Sigur e bario di Rincon ta rekerí desaroyo. ‘Jong Professional’nan di Rincon,  tambe a manda karta pa gobièrnu, nan ta mas o ménos 30, i nan ta deseá pa keda biba den bario di Rincon. Nan ta deseá pa haña un tereno pa nan por traha nan kas, loke ta algu normal i no tin nada di aber ku fabor polítiko.  E asuntu aki a tuma hopi tempu i tabatin un grupo tabata traha den Rincon i a yega na e idea pa laga e grupo hasi e tereno limpi. E meta ta pa FKPD haña pida di e tereno pa konstruí riba dje. BC a yega na e desishon pa duna FKPD e tereno, i esaki ta trese henter un bululú innesesariamente.”   

Asuntu di lusnan  

“Lusnan di Stadion ta den estado fastioso.Tabatin idea pa organisá ‘Concacaf’ na Boneiru. Dos kondishon tabatin; Mester a drecha situashon di e lusnan i drecha e vèlt pa loke ta trata e parti di e yerba artifisial. Nos a tuma un desishon, loke te dia di awe no a keda konkretisá, pa loke ta trata e parti hurídiko. Nos ta riba dje tur dia, kaminda nos a pidi FFB pa bai manehá stadion.  A bin idea pa atendé ku lusnan, loke a kana pa medio di FFB. E lusnan a keda manda sin tabatin un desishon di niun parti, i e eks direktor di ‘Bonaire Holding Matschappij’, miéntras e tabatin problema ku gobièrnu, el a tira diferente kos den laira. A laga hasi investigashon i mi mes a duna un splikashon pa papia kon tur kos a kana. Niun momentu mi no a dirigí nada den niun direkshon. Awor ta sperando e resultado final. Tur hende ta di akuerdo ku mester bin lus pa stadion. E forma kon e proseso a bai kisas mester atendé. Gobièrnu di Boneiru ya a tuma desishon pa hasi diferente kambio na lusnan di e diferente tereno. E asuntu di Coronavírùs a wanta e proseso. Nada otro ku no a palabra ta sosodiendo. Tur kos ta kanando bon. Simplemente hende ke trata na krea kos ku no ta bèrdat”, diputado James Kroon a bisa. 

Share This
error: Content is protected !!