KRALENDIJK – Mènedjer di parke Washington Slaagbaai Albert ‘Abito’ Crestian a papia di e proyekto ‘Parke bunita’, esaki relashoná ku 50 aña di parke Washington, i 40 aña parke marino. Tin diferente proyekto pa loke ta trata konservashon di e parke. E proyekto ta karga e number ‘Terestre’ ku ta trata e parti di Parke Washington i Slagbaai. Albert Crestian: “No ta konsentrá solamente riba e parti di naturalesa, sinembargo tambe e parti di atrakshon den e parke.    

Tin un plan pa 2021 kuminsá renobá e museo ku ta situá na entrada di Washington Park. E idea ta pa hasié mas atraktivo i digitalisá, kaminda e bishitante por haña un bista amplio, kiko e por spera den e parke. Esaki nan tur ta forma parti di e proyekto ‘Parke Bunita’.  

Nos a sali ku un plan, ku ya pa hopi aña ta atendé ku e parti pa tene sierto bestia ménos posibel, pa balansá e kantidat di animal, pa evitá ku nan ta kambia struktura di e parke. Tin biólogo ku ta hasi investigashon. Boneiru ya pa hopi aña ta un lugá mas bunita pa loke ta trata sambuyamentu. Pa 40 aña ta protehá bida bou di laman. Mundialmente koral ta bai atras i den e área di Boneiru ta hopi bon. Loke a bai atras ta e parti di riba tera. E problema ta ku no tin palu grandi pa tene e tera pa no bai laman. Áwaseru a kai resientemente i esaki ta laba tur e tera bai laman. E ta tapa e bida bou di laman i bo ta pèrdè tur e koral.

Un di e bestianan ku ta pèrkurá pa palunan disparsé ta kabritu. Tin kasi 30.000 kabritu na Boneiru. Den parke tin alrededor di 3 pa 4 mil kabritu, Ántes e hende a kria kabritu organisá. Tabata laga nan sali i bolbe sera nan den kura. Awendia nan ta tur dia den libertat. Aparte di kabritu, tin; buriku i porko ku nan huntu ta pèrkurá pa kome hopi mata. Momentu ku áwaseru kai, e tera ta lastra bai laman. Boneiru no tin hopi palu grandi ku ta trese entre otro sombra. Na Kòrsou ta notabel despues ku a atendé ku kabritunan, awor e mondi ta bèrdè bunita pasobra no tin hopi bestia pa kome tur mata. E idea ta pa krea kurá, loke ya nos a hasi i ta notabel e diferensia entre e matanan sera den kurá, i esun habri kaminda kabritu entre otro ta kome.

Tin un departamentu ku ta atendé ku e parke i ta studia kon pa por hasi e kosnan mas responsabel pa kuminsá saka tur bestia for di den e parke. Tin un plan amplio pa kon atendé esaki. Stinapa ta kontribuí pa hopi hende por haña kabritu. Tambe grupo di hende ta bini i bai ku kabritu pa asina baha e kantidat. Tin diferente kurá traha spesial pa gara e kabritu. E ta poko difísil pa atendé ku garamentu di e kabritu tin bia, pasobra e mondi ta grandi i tin bia nan ta bai den sierto área (den mata di tuna) ku ta difísil pa pone man riba nan. Tambe ta tira nan loke ántes tambe tabata e kaso pa por a eliminá e kabritu. Ta atendé ku e kabritunan pafó di ora di bishita. Kabritu, buriku a destruí tur mata loke ta pone ku entre otro lora ta bai den área nan habitá, i kousa molèster. Nos ta trahando duru pa kambia e parti di entrada hasi esaki mas bunita ku diferente atrakshon for di na entrada,” Albert Crestian a bisa.     

Share This
error: Content is protected !!