KRALENDIJK – Djarason mainta algu promé ku 10’or a tuma lugá un aksidente di tráfiko riba kaya gobernador N. Debrot. E aksidente tabata entre un trùk i un bròmer. Kousa di e aksidente tabata velosidat haltu kaminda shofùr di e bròmer no a tuma nota ku algun meter mas leu a pone bòrchi i bari nan kòrá ku blanku riba kaminda pa baha velosidat di outomobilistanan pa asina por hasi sierto trabounan. Un trùk a bai lora riba kaminda, nèt na momentu ku e bròmer tabata aserkando for di Playa direkshon Hato ku velosidat haltu segun testigunan. E hòmber riba e bròmer ku hèlm bistí a lastra un brek basta largu i purba evitá e aksidente pero a bai klap den banda di e trùk. E hòmber a keda heridá i a wòrdu transportá ku ambulans pa hòspital pa tratamentu médiko mas avansá. Outoridatnan a papia ku esnan ku ta hasi trabounan riba kaya pa pone bòrchi mas visibel pa asina usuarionan di tráfiko por tuma nota na tempu ku tin trabounan tumando lugá i a sera e kaya kompletu pa seguridat di e trahadónan tambe. CRS i polis di tráfiko a keda enkargá ku e aksidente.

Share This
error: Content is protected !!