KRALENDIJK – Pablo James Kroon lider polítiko di Partido UPB durante un entrevista na Radio Live 99.9 FM, a menshoná ku Partido Union Patriótico Boneriano(UPB) a kumpli awor 51 aña di eksistensia. Mi ta felisitá Ruman Ellis, un di esnan ku a pone un simia fuerte i e raisnan di e palu ta stabil den profundidat di tera. Otro persona ku mi tin ku duna pabien ta Ramoncito ‘Monchi’ Booi, kende despues ku Ruman Ellis a baha komo lider di partido, el a sigui pone kosnan kana. Awor despues di nan, ami a kontinuá ku e partido komo lider, siguiendo paso di esnan di pasado.  

E kos importante ku nos mester wak, ta e momentu di e kambio na 2010 ku tabata un paso hopi grandi i importante pa Boneiru. Awor ya 10 aña a pasa ku nos ta parti di Hulanda. Esaki ta un proseso ku a kuminsá for di 2004. Sigur e trabou ta sigui pa mehorá loke nan ta rekerí atenshon.”  

Aktivo den partido UPB 

“Na 1994 mi tabata aktivo den partido ku mi por a subi lista pa promé bia. Mirando kon kosnan ta kana ta un smak pa kontinuá i buta kosnan bon pa dilanti, na bienestar di kontinuidat. Hopi hende ta kere den UPB i semper nos portanan ta habri pa esnan ku ta deseá pa duna un man pa kontinuashon. Nos no ta bisa pa esnan ku a bai pa nan regresá, sinembargo tur hende ta bonbiní. Nos ta mira e kos den e forma ku huntu nos por logra hopi. Trabou tin ku sigui pa eksihí loke nan ku ta nos derecho, pa Hulanda rekonosé esaki i atendé. Nada kontra Hulanda, sinembargo loke nos tin derecho riba dje, nos mester hañ’é komo parti di Hulanda.  

Polítiko ta e base di un komunidat. 

Polítiko ta e base di un komunidat, apesar ku hopi no ta gusta tende, sinembargo asina e ta. Último añanan ta konosí , kaminda por skucha ku hopi bia ta bin den publisidat, ku polítikonan den gobièrnu ta ladron. Esaki ta algu ku mester kambia. No por keda ku e forma di pensa i ekspresá kontra di un polítiko. Momentu bo ta den e funshon komo diputado, kontrinkantenan ta bin riba bo, ta purba tildabo di tur kos pa daña bo nòmber. Ta bon pa nos kambia e manera di ekspresá kontra polítikonan. Tin un struktura nobo, i awendia hopi bia e hende ta menshoná ku el a vota p’abo i ta deseá pa e kos ku a primintí sosodé. No ta e persona ku bo a vota pe, ta e so ta disidí loke ta bai sosodé”, Kroon a bisa.  

Share This
error: Content is protected !!