KRALENDIJK – Mal notisia pa Aruba Boneiru i Kòrsou, durante temporada di fakansi, dianan di fiesta binidero (Pasku i fin di aña). Hulanda no ta duna konseho pa biahamentu pa eksterior. Esaki ta loke ’Outbreak Management Team’ (OMT), a bisa. Nan ta un grupo di eksperto ku ta konsehá gobièrnu Hulandes durante e temporada di krísis di Corona. Nan a menshoná ku e temporada di verano (zomer) ku a pasa, spesialmente hóbennan, a regresá for di fakansi den eksterior infektá ku Coronavírùs. OMT ta premirá ku esei ta bai ripití e fakansi di e temporada binidero, i pa e motibu aki, nan ta evitá pa e situashon bolbe pasa. E siman aki minister presidènt Mark Rutte, ta presentá medidanan nobo na Hulanda. Último periodo Hulanda a konosé enormemente hopi kaso di Coronavírùs, i ta sigur ku nan ta bai pone mas medida pa evitá plamamentu di e vírùs menshoná na gran eskala. OMT ta pidi gobièrnu pa no konsehá niun hende pa biaha pa eksterior fakansi binidero. Si esaki bira e kaso, e ta nifiká sla mas fuerte pa ekonomia di e islanan; Aruba, Boneiru i Kòrsou. Hopi hotèl i negoshinan ku ta dependé di e sektor turístiko ta pasando den situashon fastioso, debí na e pandemia kousa pa Coronavírùs. Si ménos Hulandes bai pasa nan fakansi na e islanan ABC, sigur e ta perhudiká e situashon aun mas.               

Share This
error: Content is protected !!