KRALENDIJK – “Mi ta deseá pa habri frontera entre islanan ABC”, ta loke presidente di Venezuela Nicolás Maduro a bisa e siman aki, durante un konferensia di prensa internashonal. E konferensia di prensa a tuma lugá na Palasio di Miraflores na Caracas. E presidente a kontestá diferente pregunta di periodistanan nashonal i internashonal.

“E persona kulpabel pa e konflikto di último lunanan, ta Elliott Abrams. Abrams ta un diplomátiko (‘enviado spesial’) di Merka i tin paisnan Iran i Venezuela bou di su enkargo. Bou di mando di presidente Donald Trump, e ta opservá tur interakshon ku paisnan tin ku Venezuela i a base di kon kumbiniente esakinan ta pa Venezuela. Ta trata di un bishita e aña aki, kaminda Elliott Abrams ku su korona i sonrisa, a menshoná ku Merka lo sòru di kibra lasonan diplomatiko ku e islanan Aruba, Boneiru i Kòrsou (ABC), tin ku Venezuela i ta sera porta pa Venezuela. El a papia komo si fuera e ta doño di e islanan ABC”, presidente di Venezuela Maduro a bisa.     

“E siman aki mi a pidi vise presidente di Venezuela pa kuminsá enkaminá e proseso pa solushoná konfliktonan ku e islanan ABC, i reanudá e lasonan i kuminsá ku komèrsio i kultura entre Venezuela i e islanan ABC. Pues ku un palabra pa trese bèk e relashon manera tabata den pasado entre e islanan menshoná i Venezuela. Mi ta dispuesto pa yega na un akuerdo, pa yega na palabrashon huntu ku e islanan. Nos ta bai solushoná tur problema ku tin ku wòrdu solushoná i atendé tur lokual ku ta pendiente ainda. Mi sa ku hendenan di Aruba, Boneiru i Kòrsou stima hendenan di Venezuela. Meskos ta e kaso, ku venesolanonan stima esnan di ABC.  Ban resolvé tur problema pa yega na akuerdo pa union. Mi ta dispuesto pa papia i atendé esaki i spera pronto tin bon notisia entre Venezuela i islanan ABC”, presidente di Venezuela Nicolás Maduro a bisa.     

Share This
error: Content is protected !!