KRALENDIJK – Ta bai kambia krusada di Kaya Amsterdam, Kaminda Djabou i Kaya Chippewa, kombertié den un rotònde. Radio Live 99.9 FM, a papia ku Martijn Zwiers, e persona ku ta atendé ku e parti di proyektonan, di e kompania di Boneriaanse Wegenbouw Maatschappij(BWM), komo e guiadó.

“Ya nos a kuminsá ku e parti di preparashon pa inisiá ku e trabou di e krusada menshoná riba enkargo di gobièrnu. Awe nos a traha riba e parti pa desviá e tráfiko na momentu ku e trabounan kuminsá. Otro siman e trabou pa konstruí un rotònde na e sitio ku awor ta un krusada ta start. Ta trata di un rotònde ku e mes un konsepto ku esun na altura di Misa di Playa. E rotònde ta forma parti di e proyekto di asfalta kaya rònt di skol. A dura algun luna èkstra, sinembargo tur kos ta kla pa ehekutá e trabounan di konstrukshon di un rotònde na e sitio.

E proseso pa inisiá e trabou a tarda poko, debí ku mester a re-diseñá kon ta bai pone e rotònde, mirando e diferente aspektonan bou di tera na e sitio. Si tur kos kana bon e ta planiá pa keda kla pa outomobilistanan por usa e rotònde, dia 11 di desèmber 2020, esta promé ku fakansi di trahadónan den konstrukshon. Tin kosnan ku no ta den nos man, entre otro yobida fuerte ku por bai tin den e periodo ku mester konstruí e rotònde, pero nos lo hasi tur ku ta posibel pa esaki ta kla den e tempu stipulá. Despues ku kaba konstruí e rotònde, pa kompletá e proyekto di asfalta kaya rònt di skol tin tambe un pida di Kaya Amsterdam ku mester wòrdu renobá te na altura di Kaya Leiden. Pero nos no a tende nada di gobièrnu ainda tokante di esaki.

Un súplika ta bai outomobilistanan tuma nota di e bòrchinan di indikashon den e área, i sigui e reglanan i tene velosidat regulá. Si no ta nesesario pa usa e kaya, kisas ta mihó pa pasa via otro ruta. E trabounan na e sitio ta bai tuma lugá durante dia entre; 7’or di mainta pa 4’or di atardi den siman, i por disidi kualke momentu ku ta nesesario pa kontinuá ku sierto trabou pafó di e ora menshoná (overtime) òf den wikènt”, Martijn Zwiers kende ta guiadó di proyekto pa BWM a bisa.  

Share This
error: Content is protected !!