KRALENDIJK – Djadumingu atardi despues di un pal’i awa ku a yobe, Radio Live99.9 FM a haña yamada di algun habitante di Kaya Den Tera na Antriol Pabou di un situashon a-higieniko i no tolerabel. E habitantenan a splika ku nan ta pasando den un situashon desagradabel despues ku awa a yobe. Nan a referí na e stashon di Kloaka ku tin nèt pabou di e pòmp di gasolin na Kaya Den Tera. Pa un motibu òf otro por a konstatá ku un awa sushi koló shinishi i ku un holó stinki tabata basha for di e tanki riba e pida seritu ku tin den kurá di e stashon di Kloaka. Riba e pida seritu tin un pòmp instalá. E awa aki tabata kore i brua den e awa ku a yobe, pasa riba kaminda i bai para den kurá di habitantenan den e kaya. “Nos no por habri porta di kas paso tin un holó desagradabel ku por hasi nos malu. Aparte di holó stinki ku mester soportá tur dia, awor asta awa sushi ta basha’fo i bin para den nos kurá. Nos no por komprondé kon gobièrnu a aprobá pa konstruí un stashon di awa sushi di Kloaka mei mei di kasnan i negoshi. Ta di spera ku miembronan di Konseho Insular por hasi pregunta tokante e situashon aki. Algun aña kaba nos tin ta soportá ku tur e konsekuensia ku esaki por tin pa nos salú”, e habitantenan a konta.

Radio Live99.9 FM entretanto a pone WEB NV ku ta manehá a stashon di Kloaka na altura di e situashon ku a surgi. Trahadónan a keda di bai wak kiko a bai robes ku a pone e awa sushi di Kloaka a yena te basha’fo.

Share This
error: Content is protected !!