KRALENDIJK – Djasabra anochi alrededor di 11’or notifikashon a drenta na warda di polis ku un tiroteo a kaba tuma lugá na altura di un kas den bario di Tera kòrá.

Mesora a dirigí unidatnan polisial pa e kas situá na skina di Kaya Miranda i Kaya Tapajos. For di un investigashon preliminar ku outoridatnan a hasi na e sitio por a komprondé ku un hòmber bistí kompletamente na pretu a presentá na pia na e adrès menshoná i a lòs un tiru riba un otro hòmber ku tabata den kurá di e kas. E hòmber a kore pa su bida pa no keda alkansá pa bala. E bala for di e arma di kandela ku e sospechoso a lòs, a perforá porta di patras di un vehíkulo koló kòrá ku tabata pará den kurá di e kas. E sospechoso a hui bai na pia for di e sitio.

No tabata tin herido, pero a dirigí ambulans pa e sitio pa hasi un kòntròl médiko riba e hòmber ku a kore pa su bida i den korementu a frakturá su pia.

Reshèrshinan di e departamentu di ‘Technische Opsporingsdienst’ a presentá na e sitio pa hasi un investigashon i a konfiská hùls ku a keda atras. Informashon no ofisial ku Live99.9 FM ta disponé di dje ta indiká ku probablemente e kaso aki por tin di haber ku un otro kaso di tiroteo ku a tuma lugá algun siman atras ku ainda outoridatnan no a resolvé. E kaso aki tambe ta bou di investigashon.

Algun ratu promé outoridatnan polisial i reshèrshi a presentá na un otro kas den e mesun kaya i a tene un entrada hudisial kaminda detenshon a kai. Esaki ta separá for di e kaso di tiroteo.

Share This
error: Content is protected !!