KRALENDIJK – Gezaghèber Edison Rijna a papia ku komunidat relashoná ku e situashon aktual di Coronavírùs (CoViD-19) na Boneiru.

”Nos a logra di baha e kantidat di persona ku lokal a pega ku CoViD-19 hopi lihé. Boneiru a hasi petishon pa bai kódigo hel bèk. Algun siman pasá a pidi Hulanda pa bai kódigo oraño pa protehá salubridat públiko di Boneiru. E kódigo oraño aki kier men ku ta deskonsehá pa bini Boneiru. Awor ku e kantidat di kasonan di CoViD-19 a baha drástiko, a pidi Hulanda siman pasá pa bai bèk kódigo hel. Te ku awor nos no a haña kontesta for di Den Haag. E motibu ku e kontesta riba nos petishon ta dura asina largu, ta pasobra Hulanda ta deseá pa bini ku un konseho pa henter Reino. Pa haña tur hende riba mesun liña ta tuma mas tempu ku a sperá. Ta papia tur dia ku Den Haag paso nos kier un kontesta i aklarashon mas lihé ku ta posibel. Turismo kon ku bai bini ta e pilar mas importante di nos ekonomia. Ta dura mas tantu ku nos a kere p’esei ta papiando ku e sektor turístiko. Ta wak posibilidat pa otro pais komo alternativa pa Hulanda i asin‘ei tòg haña turista bini nos isla. Pronto lo mi tin mas informashon tokante esaki”,gezaghèber Rijna a bisa.     

Share This
error: Content is protected !!