KRALENDIJK – Gobièrnu di Boneiru ta deseá pa hasi mas fásil e proseso pa un invershonista òf empresario haña pèrmit pa un empresa di su deseo. Pa esaki lo introdusí un asina yama ‘One Stop Shop’. Hennyson Thielman a splika tokante esaki durante den reunion di Konseho Insular. E ta konsehero di diputado Elvis Tjin Asjoe. “E ‘One Stop Shop ta enserá ku e empresario por yega na un lokèt i pidi pa un pèrmit. E no mester pasa diferente kaminda, entre nan; ofisina di poblashon, R&O, KVK i ofisina di impuesto. Nos ke simplifiká e proseso. E intenshon ta pa krea un sistema online, i momentu e impresario disidí pa kuminsá un negoshi, e ta bai online i yena su informashon i risibí e pèrmit nesesario. Esnan tras di kortina tambe mester por aselerá e proseso rápido. Pasobra tantu bal hasi e proseso online pa e kana mas rápido i esnan tras di kortina ta stanka e proseso. Ya nan ta atendiendo e asuntu pa tur kos bira mas rápido. Kolegio Ehekutivo a reserva fondo pa inisiá e inisiativa menshoná. Plaka mester ta sufisiente pa karga e plan. E ta rekerí hopi sèn pa ehekutá e plan den su totalidat. E plan ta pa traha esaki huntu ku sektor priva, i tambe i huntu ku ministerionan Hulandes. Esaki ta bon ya momentu ku yega asina leu pa ehekutá e plan, Hulanda tambe tin un ròl grandi pa yuda ku e parti finansiamentu”, Hennyson Thielman a bisa. 

Share This
error: Content is protected !!