KRALENDIJK – Trabou pa drecha Kaya Carlos A. Nicolaas ta bai den bon direkshon. Esaki Martijn Zwiers a bisa Radio Live 99.9 FM. El a bisa; apesar ku den prinsipio trabou a kana poko stanká, awor nan ta riba un bon spit pa terminá e trabou na e kaya, ku ta pasa banda di NAPA OUTO PARTS.  “E krusada di Kaya Carlos A. Nicolaas i Kaya Gobernador N. Debrot, tabata e área ku a tuma mas tempu di loke tabata planiá. E parti ei a pasa, i awor ta momentu pa konsentrá riba Kaya Carlos A. Nicolaas. Na e krusada menshoná mester a atendé ku entre otro kabel di koriente, pipa di awa i e parti di pasada di awa, momentu ku áwaseru kai. Tur esakinan a pèrkurá pa hopi dia di trabou. Pa loke ta trata Kaya Carlos A. Nicolaas e proseso ta hopi mas fásil den komparashon ku e krusada menshoná, loke ta hasi e trabou bai mas rápido. Na e área di e krusada T ku ántes tabata Y, gran parti di e asera ta bira awor di klenku. Aktualmente nos ta trahando riba 4 proyekto na mes momentu i e trabounan ta bai bon. Tin plania pa terminá 2 di 4 trabou di drecha kaminda pa 11 di desèmber. Na luna di Yanüari 2021 ta kontinuá. Si tur kos kana bon pa 11 di desèmber outo por usa e kaminda di Kaya Carlos A. Nicolaas. Tin sufisiente trahadó aktualmente riba  diferente trabou, pues e spit ta bai den bon direkshon”, Martijn Zwers a bisa. Tambe el a menshoná i pidi outomobilistanan pa trafiká ku ménos velosidat posibel den e área nan di trabou. Tin diferente hende ta trahando tin bia nan por ta hopi serka di e rant di kaminda. Ku bon koperashon di nos tur, trabounan ta bai hopi bon.   

Share This
error: Content is protected !!