KRALENDIJK – Djaluna 2 di novèmber, alrededor di 7:45 di anochi, outoridatnan polisial a risibí notifikashon ku un kaso di tiroteo a tuma lugá atrobe den bario di Tera Kòrá. Habitantenan di e bario a skucha zonido di bala for di un arma di kandela. Mesora un batayon di polis i reshèrshi a presentá den bario di Tera Kòrá i kuminsá ku un investigashon ku a konsentrá na e mesun kas kaminda a lòs bala djasabra último na Kaya Miranda. Na e sitio por a komprondé ku un persona ku outoridatnan probablemente sa ta ken, a pasa lòs bala riba un otro persona riba kaya. E persona ku nan a tira riba dje, a kòrta su pia den korementu pa milagrosamente bala no alkanse, pasando den un mondi pa kore bai skonde na e mesun kas ku tabata tin un tiroteo djasabra último. Ambulans a presentá na e adrès pa atendé ku e víktima ku a kore pa skapa su bida. E víktima no mester a bai hòspital.

Despues ku a kaba hasi un investigashon na Kaya Miranda, e tim di reshèrshi ku lo tin sierto pista nan kaba, a bai hasi un investigashon na altura di un kas den Tera Kòrá mes.

Investigashon ta kontinuá i detenshon lo por bai kai un ora pa otro.

Share This
error: Content is protected !!