KRALENDIJK – USIBO a tuma nota di e echo ku Hulanda a disidí di lo bai paga un gratifikashon na e personal di kuido pa e trabounan balioso i noble ku nan a ehersé durante e pandemia di Covid 19 aki.

Ku asombro i desapunto USIBO a tuma nota tambe ku e desishon a kai ku e gratifikashon aki lo kontra solamente pa e profeshonalnan den kuido na Hulanda i no pa esnan den Hulanda Karibense, pues na Saba, Statia i Boneiru. Mesora e pregunta a surgi ku ta otro hende nos profeshonalnan ta, ta otro rasa nos profeshonalnan ta, ta otro nashonalidat nos profeshonalnan tin, ta den otro pais nos profeshonalnan ta biba. E kontesta riba tur e preguntanan aki ta NO. Nos profeshonalnan den kuido tin e mesun nivel ku nan koleganan na Hulanda, nan tin e mesun nashonalidat, e mesun pasport i ta biba riba teritorio Hulandes, sea numa ku e teritorio ta parti den dos aria, esta unu na Oropa i e otro den Karibe. Pues nan trato no por ta desigual i deskriminatorio pa motibu di lokalidat.

Segun USIBO su interpretashon desviashon for di artíkulo 1 di nos konstitushon – nos tur ta igual pa lei – ta solamente posibel ku si e regla o lei ku kier apliká ta esensialmente diferente entre Hulanda Oropeo i Hulanda Karibense. Pues e mester ta basá riba argumentunan ophetivo i no riba buena gana(willekeur). E argumento ku a uza pa no apliká e gratifikashon ta ku e pandemia no a dal asina duru na e islanan Karibense, pues e peso i efekto no ta e mesun grandi riba e profeshonalnan den kuido. Korektamente e parlamentario di SP si mi no ta kiboká a kuestioná e argumentu aki i ku un gran parti si no ta e mayoria di Tweede Kamer ta di akuerdo ku mester apliká e regla aki tambe pa e profeshonalnan den Hulanda Karibense.

Na Boneiru nos profeshonalnan den kuido a traha bou di preshon, bou di inseguridat i a duna tur nan tempu, energia i hasta nan salú pa duna e mihó kuido posibel na tur ku tabatin mester di kuido en general i esnan afektá pa Covid 19 en partikular. E kuido aki a sosodé den Mariadal, na kas, den institutonan di kuido ekstramural, manera Cocari, Villa Antonia, Ka’i Mimina i tambe na FKPD. P’esei USIBO ta sostené e posishon ku AFBW a tuma i USIBO tin sigur ku na nan manera ABVO tambe lo a laga su bos di protesta resoná. Ta e dos sindikatonan aki tin representashon den e sektor di kuido aki na Boneiru.

USIBO ta di opinion ku Fundashon Mariadal, Fundashon FKPD pero tambe gobièrnu di Boneiru i hasta si ta nesesario Konseho Insular di Boneiru mester uni den esaki i manda direkshon Den Haag e mensahe ku nos no ta akseptá ni koperá ku deskriminashon i desigualdat kaminda esaki no tin un base ophetivo manera esaki a keda palabrá i ankrá den artíkulo 132ª di e konstitushon.

Share This
error: Content is protected !!