KRALENDIJK – Awe djamars mainta trempan, algu promé ku 8’or polis a haña notifikashon di un kaso di bringamentu na riba un tereno na altura di e proyekto di konstrukshon, kaminda ántes tabata Hotèl Bonaire. Ta trata di un sitio kaminda aktualmente ta konstruyendo un hotèl nobo. E kompania ‘Haafkes Bouw Bonaire’ ta hasi e trabou di konstrukshon. Momentu ku polis a presentá, ya e bringamentu di sea 2 òf mas persona a trankilisá. Den e bringamentu entre otro tabata enbolbí e doño di e kompania di konstrukshon na e sitio, kende a wòrdu agredí pa un òf mas trahadó. Informashon ku Radio Live 99.9 FM ta disponé di dje ta indiká ku probablemente e problema a okurí debí ku trahadónan ta hopi mal kontentu ku e doño di trabou. Ya tin mas ku 2 luna sin ku nan a kobra nan salario, i esaki ta hinka nan den hopi problema ku nan debernan ku nan tin pa kumpli kuné tur luna di nobo. Kada bia trahadónan ta tende storia di e doño di trabou, ku nan ta bai haña nan sèn, sinembargo nada di bèrdat. Awe mainta e situashon a sali kompletamente for di man. Polis a kuminsá ku un investigashon, i tin keho a keda entrega pa loke a sosodé. A detené un persona tambe na e sitio i transport’e pa warda di polis. Trahadónan na e sitio a papia ku Radio Live 99.9 FM, kaminda nan a bisa di a kana diferente kaminda i nan ta hopi desgustá ku e asuntu di e kompania pa loke ta trata pagamentu di trahadónan fin di luna. Esaki no ta promé bia, sinembargo na mas ku un okashon tabatin problema tokante asuntu di pago pa trahadó. E investigashon den e kaso aki ta andando.    

Share This
error: Content is protected !!