KRALENDIJK – Dia 3 di novèmber 2020 tin elekshon na Estádos Unídos pa eligí 538 miembro di kolegio elektoral pa skohe e presidente. Bonaire tambe konosé un kolegio elektoral di 9 persona ku ta skohe miembronan di Eerste kamer. A yega na 538 miembro di e siguiente manera. Kongreso, e poder legislativo, ta konsistí di dos kamber. Kamber di representantenan ku tin 435 miembro i Senado tin 100 miembro. Pa e kolegio elektoral ta konta e miembronan di kamber di representantenan, miembronan di Senado i 3 di Washington. Kada estado ta skohe un kantidat di miembro. Por ehèmpel California ta skohe 55, Texas ta skohe 38, Florida ta skohe 29 i tin estado ku ta skohe 3 miembro. E partido ku haña 270 miembro di tur e estadonan ta skohe e presidente i su vise presidente.

Esaki ta enserá ku un partido por haña ménos voto i tòg gana i skohe e presidente. Si na California partido Republikano gana ku diferensia di un voto e ta haña tur e miembronan, no tin repartishon di kantidat di miembro. Tin estado ku ta bastion di Republikano i tin ku ta di Demokratnan. Tin estado ku tin biaha ta Republikano i otro biaha Demokrat. Den e elekshon aki no ta Covid 19, ni e debatenan ni e enkuestanan, ni ku si Trump a kumpli ku su promesanan ta duna e resultado, pero simplemente media sosial ta e faktor mas importante. Twitter ta mustra ku Trump tin dies biaha mas tantu siguidó i Facebook ta e plataforma mas mihó pa influensiá votadó. Si Biden ke gana e mester kuminsá gana na Florida. No lubidá intentonan di Rusia, China i Iran pa influensiá elekshon. Un punto fuerte di Trump ta ku Estados Unidos no a kuminsá un guera den eksterior. Demokrat nunka ta pa start guera den eksterior. Trump su diplomasia si tabata debil relashoná ku Rusia i Nort Korea pero fuerte kontra su aliadonan den Nato i benefisio pa Israel i Saudi Arabia.

Share This
error: Content is protected !!