Kralendijk – Aimed Ayubi: ”Boneiru a pèrdè un tremendo persona, tremendo artista, kantante i komersiante. Un notisia ku a shòk nos, momentu ku nos a tende ku Julius Andrew (nòmber artístiko), kende su nòmber ofisial ta Andre Eduardus Snijders a fayesé na Hulanda kaminda e tabata biba e último añanan. Un persona hopi kerí i di kas serka nos. Un persona hopi konosí spesialmente riba tereno artístiko komo kantante, i un hende amabel ku amor pa tur hende. Esei ta Julius Andrew.

Julius Andrew a nasé dia 6 di yanüari 1954 na Kòrsou, sinembargo el a biba gran parti di su bida na Boneiru. Muzik i kanto tabata su bida i pashon. Ranchera tabata loke mas e tabata gusta kanta ku hopi amor. E ta bon konosí riba Aruba, Boneiru i Kòrsou pa su presentashonnan. Tambe el a presentá na Hulanda, Merka, i tur kaminda nan a gusta su manera, loke e hendenan tabata komentá di dje. Un tremendo kantante, bon presentadó i bunita stèm.

Su asuntu nan médiko tabata bai den bon direkshon, loke el a bisa dia e tabata último na Boneiru. E deseo tabata pa pronto e regresá Antias pa kontinuá ku su bida. Algu mas ku un siman pasá, nos a tende e notisia ku e kosnan a bòltu i e situashon di salú, ta delikado, i fin di siman tras di lomba el a bai sosegá.  

Djabièrnè awor, esta mañan 6 di novèmber, e kurpa sin bida di Julius Andrew ta yega Boneiru. Ta kalkulá ku entre 4’or pa 5’or di atardi, e avion di KLM ku ta transportá e kurpa di e defuntu ta pisa suela di Boneiru. E prosedura ta bai den e forma ku Julius Andrew mes a pone riba papel. Ta pidi esnan ku por, pa kore tras di e outo ku ta transportá morto, pa Consuelo Memorial. Djadumingu 8 di novèmber atardi; 6’or pa 8’or di anochi, tur hende ku ta deseá por tuma despedida di e defuntu na Consuelo Memorial. Djamars 10 di novèmber, e kurpa sin bida di Julius Andrew, ta bai Kòrsou ku e barku Don Andres 1. E entiero ta tuma lugá na hermana isla Kòrsou. Esnan ku por, ta posibel pa kompaña e outo ku ta transportá e defuntu pa hib’é barku for di Consuelo Memorial riba djamars.

Share This
error: Content is protected !!