KRALENDIJK – Manera ta bon konosí, Frente Sosial Progresivo (FSP) ta boga pa legalisá Cannabis medisinal aki na Boneiru. Presidente i lider polítiko di FSP a entregá un karta ku e petishon aki na Sekretario di estado Knops pa legalisá e yerba pa Boneiru tambe meskos ku na Hulanda ta e kaso.

Despues di a profundisá mas den e materia a yega na e konklushon ku Cannabis rekreashonal tambe lo tin un balor inmenso pa nos isla. E pandemia di Covid 19 tin mundu den su gara pa basta tempu, e peliger ku e vírùs aki a kousa ta grandi , e daño ekonómiko i sosial ta inmenso. Hopi ta e islanan den Karibe ku ta dependé di e industria di turismo. Tur ku di un otro forma ta biba di turismo a, ta i lo sinti un pèrdida di entrada nunka bisto den historia di e sektor aki. No tin un bista ki dia i kon e industria aki lo rekuperá i kon e turismo nobo aki lo ta. Un bia mas por a sinti kon frágil un ekonomia basá riba un solo pilá ekonómiko ta.

E krísis ku Venezuela ta den tambe tin su efekto riba islanan ABC. PdVSA ta den problema serio i esaki tin su efekto riba Bopec ku lógikamente tin su impakto negativo pa Boneiru. Pues e industria di turismo i petroli ta bou di preshon i ta den krísis, negoshi ta bai malu, no tin ganashi i esaki na su turno tardi o tempran lo nifiká pèrdida di kupo di trabou i impuesto pa gobièrnu. Hopi ta esnan ku a papia di diversifikashon di nos ekonomia, pa un o otro motibu ainda esaki no a kristalisá.

Boneiru por sigui ehèmpel di hopi pais na mundu ku a legalisá Cannabis i mira kon esaki a benefisiá e komunidat positivamente. Cannabis ta un mata ku hopi potensial esaki por krea un sektor ekonómiko nobo, ku tin un futuro briante su dilanti. FSP ta konvensí ku ta ora pa kana e trayekto pa legalisá Mariwana, no tin diskushon pa ku e balor medisinal di e yerba, esaki pa hopi tempu ta sientifikamente probá kaba. Awó ta ora pa bai pa esun rekreativo ku tin hopi benefisio pa e produktornan i tambe komersio. Pues mester planta i eksportá e produktonan derivá di e mata, lógikamente tantu konsumo lokal i eksportashon ta bai kontrolá pa instansianan ofisial.

FSP ta apresiá ku tin mas organisashon (Fundashon) a lanta pa hiba e lucha pa legalisá Cannabis den su totalidat. “Un estudio ofisial na Aruba ta bisa ku cannabis medisinal por krese e Pais su ekonomia ku 10 porsiento. Rònt mundu tin paisnan ku a mira nan ekonomia krese despues di legalisashon di produkshon i konsumo di e mata aki. FSP ta di opinion ku Mariwana ta E remedi pa hende pero tambe pa nos ekonomia Boneriano.

Awó ta ora pa eksihí legalisashon di Mariwana pa Boneiru tambe i no pa Hulanda so. No por sigui pensa malu i antikuá i laga e oportunidat di oro aki bai pèrdí . E pèrdida di entrada okashoná pa e krísis petroli i e pandemia di e vírùs di corona ta un realidat ku Boneiru ta eksperensiando. Nos por sigui bringa, lucha i pretendé ku konseptonan ekonómiko ku nos konosé kaba o buska moda di bai ku tempu i aseptá e bondat medisinal i ekonómiko di cannabis. FSP lo para fuerte pa e trayekto di legalisashon di cannabis rekreativo ku ta kanando na Hulanda ta aplikabel pa Boneiru tambe.

Nos tin tera, solo i awa, esaki ta e kondishonnan primordial pa produkshon di Mariwana di bon kalidat, pues ta ora pa lanta i brasa e oportunidat di oro aki. Tur shimaruku ta hechu , basta ku nos liberá nos mente di tabúnan , hopi biaha polítikamente o ekonómikamente fabriká, i mira e realidat i potensial medisinal i ekonómiko ku cannabis ta representá. Tantu Aruba komo Kòrsou ta trahando riba e produkto i sektor nobo aki den Karibe Hulandes, pues Boneiru tin ku move pa atrobe nos keda tras i yora malai.

Esaki segun e Presidente di Frente Sosial Progresivo, Renny Winklaar.

Share This
error: Content is protected !!