KRALENDIJK – Un dama hopi desepshoná a presentá na ofisina di Radio Live 99.9 FM, pa ekspresá loke a sosodé, esta a stòp di entreg’é sèn di ‘nood regeling’. Ta trata di suidadano Adriana Lopez.

“Mi ta risibí sèn pa medio di e sistema di ‘nood regeling’, esaki for di luna di mart 2020. E tabata bai bon, kaminda tur luna mi tabata haña sèn. Miéntras tantu mi tabata buskando trabou i no a logra haña un. E idea ta pa mi traha i tin mi sèn, hasiendo trabou. Despues di no a haña trabou, mi a pensa kisas kuminsá plania pa hasi algu riba mi mes, i ainda mi no a kuminsá debí ku mi mester di material pa por inisiá loke mi ta pensa.

Fin di sèptèmber mi a bai ofisina di SZW, debí ku mi no a risibí sèn. Na lokèt nan a tuma mi informashon pa wak dikon mi no a kobra. A pidimi pa traha un sita, i mi a puntra dikon a stòp di manda sèn p’ami? Nan a bisa; debí ku nan a yamami na telefon diferente bia, i no a tende dimi, a stòp e sèn ku tabata bai riba mi kuenta tur luna. Ami a bisa nan niun momentu nan a bèl riba mi telefon. Mi a persistí i nan a laga un otro persona atendé kumi. El a bisami nan a yama i no a hañami. Nan a mustrami e number, i no tabata mi number di telefon. Mi a bai kas i despues di 2 dia mi a bai aya na e ofisina di SZW un bia mas. Promé kos ku mi a puntra pa wak kua number boso nan a yama. Nan a tuma e kos manera ta pleita mi ta pleita, sinembargo simplemente mi ta deseá pa un solushon i kiko a bai robes. Despues di un ratu un señora a bisami kariñosamente; tur kos ta reglá i denter di algun dia lo mi risibí e sèn di luna. Dia a bai i mi no a haña sèn. Mi bishita na e ofisina tabata manera un molèster pa e trahadónan, loke mi por a nota serka nan i nan aktitut pa atendé ku mi persona.

Un siman despues mi a regresá e ofisina i a bisa nan mi no a risibí niun sèn i dia ta bai. Nan a informámi; e persona ku a yudami ta ku fakansi i mi mester warda e regresá pa por atendé e kaso. Mi a bisa nan ku mi no por sigui asina sin sèn. Nan a atendé mi den un forma habri pa tur hende presente tende loke nos ta papia, loke ami a haña ta inaseptabel. Nan por a bai un sitio kaminda solamente nos 2 ta komuniká i tende otro. Otro kos, mi a puntra nòmber di esun ku a atendémi asuntunan, pa asina mi sa ku ken mi a papia i si mester atendé ku un otro persona mi por bisa serka ken mi tabata. A bisa ku nan no por duna nòmber. Pues mi nòmber si nan sa, i esun di nan si, nan no por bisa.

Mi a bai for di e ofisina, i dia ta bai i mi no a tende nada. Mi a bolbe bai aya i pidi pa papia ku e hefe. Nan a bisami no por pasobra mester traha sita. Mi a bai papia ku otro persona, ku bon posishon kende ta atendé ku e asuntu di ‘nood regeling’. El a bisami no por ta bèrdat ku trahadónan a tratami malu. Nan sa nan trabou i ta trata tur hende igual i korekto. El a bisami e ta bai wak un ke otro i lagami sa di e asuntu aki.

Mi a bai kas despues di algun dia niun sèn i no a informámi di nada. Te dia di awe nan no a bisami nada i awor mi a haña un karta fecha 3 di novèmber, kaminda ta informá e motibu ku a stòp di manda sèn p’ami. Nan a para mi sèn debí ku mi a falta rèspèt ku nan, ami i mi pareha. Mi tin responsabilidat pa kumpli kuné na kas i kon mi ta bai hasi ku esaki. Mi ta hasi esaki ku hopi esfuerso pa mi yunan i famia ku tin hamber i mester kome. Mi ta spera bin un klaridat den e asuntu aki. Esun ku ta deseá pa yuda den e kaso aki por tuma kontakto libramente ku ami”, Adriana Lopez a bisa.           

Share This
error: Content is protected !!