KRALENDIJK – BoVoBo ku ta e bònt di vòlibòl di nos isla ku sosten i apoyo di 41 pais den kongreso siman pasá.

Mas aleu pa loke ta vòlibòl di nos isla den su totalidat, sra. Gisette Emer di e bònt di vòlibòl di nos isla ku ta BoVoBo, den entrevista den e programa aki e siman aki, a bisa ku vòlibòl den su totalidat pa loke ta e parti positivo, a yega na sierto desishonnan ku enkuentronan por tuma lugá mas lihé i no ta keda dependé di aeroliñanan kon pa yega otro paisnan mas fásil.

Pa loke ta e parti tékniko, laga nos yamé positivo, tabatin un kongreso fin di siman pasá, di kua tur 41 pais miembro por tabata presente dor di e fasilitashon digital.
Ku esaki tur e paisnan por a trese nan opinionnan i por a partisipá intensivamente durante e wikènt di kongreso.
E kongreso tabata unu elektoral kaminda ku e direktiva nobo di Norceca a keda eligí. Boneiru awó ta forma parti di dos di e komishonnan ku a keda eligí durante e kongreso.
Ta trata di komishon di desaroyo i komishon di Beach Volleyball.

Boneiru awó ta forma parti di e komishonnan ei ku representashon total ku sosten di tur e paisnan ku tabata presente na e kongreso, esaki dor di sostené Boneiru kompletamente den esakinan, pa e forma kon Boneiru ku ta un isla asina chikitu i ku e kantidat di habitante ku e tin, por a logra organisá sierto aktividatnan di vòlibòl ku éksito.
Boneiru a haña apoyo total di e paisnan miembro na e kongreso aki.

Pa loke ta e dos posishonnan den e dos komishonnan aki, Boneiru a logra haña puntuashonnan pa esakinan dor di e Beach Volleyball ku Boneiru a organisá na 2019 ku tabata un logro fenomenal, loke a keda rekonosé tambe pa tur e paisnan miembro i tambe Norceca i Cazova, kon Boneiru por a partisipá i organisá un evenementu di e kaliber ei riba nos isla.

Anto pa e motibu ei Boneiru a haña e nominashon tambe di tur e otro paisnan pa keda eligí pa ta den e komishon di Beach Volleyball.
Pa loke ta e nominashon i tambe eligí den e komishon di desaroyo, esaki mirando tur e lokenan ku Boneiru a bin ta hasi, kon nos pais a bin ta kresiendo den esaki teniendo kuenta ku sr. Juan Cartagena a bin Boneiru na diferente okashon pa e partinan di entrenamentu eskolar, tambe e klínikanan ku sr. Juan Cartagena a duna i partisipá, a mira ku Boneiru tabata bayendo kompletamente den un desaroyo total pa ku vòlibòl di nos isla.

Tambe petishonnan di Boneiru pa yudansa pa desaroyo, ta wòrdu kumplí ambos banda.
Por ehèmpel ku si algu pasa na Boneiru, BoVoBo ta traha e rapòrtnan pa nan.

Pa e dosnan ei, nan tabata asina kontentu ku nan a pone ku Boneiru aworakí ta forma parti di e komishonnan aki.
Riba nos pregunta, sra. Gisette Emer a bisa ku tur e paisnan na e kongreso a sostené Boneiru pa logra keda eligí komo miembro di e dos komishonnan ku ta desaroyo i tambe di Beach Volleyball.

Ta trata di dos komishon sumamente importante pa Boneiru, di kua e promé ku ta desaroyo, esaki sigur ta algu ku lo sirbi Boneiru en grande sin mas pa loke ta desaroyo di e deporte di vòlibòl di nos isla.

Tambe si nos mira e otro komishon ku ta di Beach Volleyball, Boneiru mirando kon a organisá un torneo di Beach Volleyball asina eksitoso aña pasá, lo sirbi Boneiru pa sigui organisá e torneo internashonal aki di Beach Volleyball den futuro.

Share This
error: Content is protected !!