KRALENDIJK – Informashonnan ku nos tin i ku a yega nos redakshon deportivo, ta mustra ku kampionato 2020-2021 di futbòl di nos isla, ta kuminsá dia 25 di e luna aki, 25 di novèmber 2020 pues.

Djamars otro siman segun e informashonnan, lo tin reunion ku e klupnan di futbòl afiliá na e federashon di futbòl ku ta FFB. Durante e reuion aki lo papia tur loke ta regardá e kampionato ku e klupnan miembro, pa despues prepará pa e kampionato kuminsá dia 25 di novèmber 2020.

For di algun siman pasá tin palabra di nos Promé Mandatario, Gezaghebber sr. Edison Rijna ku por kuminsá, pero a keda spera riba e partisipashon ofisial di e komishon ku ta atendé esaki, sin tende nada nada ainda di e komishon ku no ta logra haña kontakto tampoko kuné. Si logra haña kontakto mes, no ta haña ningun informashon konkreto di esaki.

FFB no ta bai warda mas, djamars ta reuní ku e klupnan miembro pa kuminsá dia 25 di e luna aki den forma di kalentá pa sigui ku e parti kompetitivo di e kampionato.

FFB tin tur kos kla basta dia kaba pa kuminsá, solamente tabata pendiente di un kontesta di e komishon di salubridat relashoná ku esaki.
Lo hunga sin públiko manera a bisa pa kumpli ku e eksigensianan di e komishon i desishon di nos Promé Mandatario. Weganan lo bai via “live streaming” di manera ku e fanatikada por sigui esakinan via e sistema aki.

Skema pa e kampionato ta kla, rèfrinan tur ta kla pa kuminsá, stadion ta OK pa kuminsá, pues bala tei kuminsá lora dia 25 di e luna aki, esaki ku partidonan pa kalentá i kana drenta e kampionato kompetitivo.
Foi djawó nos ta deseá e klupnan di futbòl den e kampionato tur kos bon i éksito ku e kampionato.

Share This
error: Content is protected !!