Kralendijk – Diputado James Kroon ta hopi kontentu e forma rápido i stabil ku Maurice Adriaens a atendé i desaroyá e área riba e tereno na L.V.V. “For di mas o ménos 8 aña pasa a inisiá ku e proyekto, kaminda e awa di kloaka ta yega, pa krea 12 pida tereno i laga invershonistanan lokal desaroy’é. Nan por a planta riba esaki i desaroye ku entre otro fruta i berdura pa e pueblo di Boneiru. Esaki a tuma poko tempu, i awor a yega asina leu ku tin e promé grupo di invershonista ku a pone nan mes disponibel. Nos ta hopi kontentu ku e direktor nobo di RNO i e direktor di L.V.V., kende ta Maurice Adriaens, ku a pone nan mes hopi intensivo pa a logra ku e kosnan ta kana den bon direkshon. For di momentu ku Maurice Adriaens a drenta e funshon na L.V.V., ta notabel un entusiasmo grandi serka tur hende, pa loke ta trata plantamentu na e área. Nos komo gobièrnu ta felisitá e grupo di persona, kende ta hasiendo un tremendo trabou. Tin algun tereno mas disponibel, i esnan ku ta interesá por akudí pa yega na un di e terenonan. Esaki ta e promé paso pa e hende por planta i yega na su mes fruta i berdura. Aparte di mata ta atendé ku piska tambe, pues hopi bon trabou tin i ya aya na L.V.V. . E idea ta pa bai duna e konosementu ku e hendenan tin, pa skolnan i duna kurso pa yuda tur esnan interesá pa siña planta. Esaki sigur ta un paso grandi pa Boneiru. Hopi aña tin ta papia di sembra nos propio kuminda i awor e ta den e direkshon. Pues huntu ku L.V.V., ban sigui pa nos planta i produsí nos propio kuminda na Boneiru”, diputado James Kroon a bisa.         

Maurice Adriaens: ”Ta un dia históriko, pa awor loke pa hopi aña tabata planiá i deseo di diputado James Kroon bira un realidat. Ta trata di un forma di plantamentu na Boneiru, no solamente planta den kunuku, sinembargo tambe un L.V.V reorganisá. Awor riba tereno di L.V.V. a krea diferente sekshon di tereno, kaminda hende por hür e área ku nan ta deseá pa por planta riba dje. Ta trata di un área di agrikultura avansá. 6 luna pasa mi a kuminsá traha riba e proyekto i danki na RNO i diputado ku nos a logra pa por tin tereno disponibel pa otronan planta riba dje. No solamente den plantamentu di berdura, sinembargo fruta i krio di bestia. Falta hopi mas pa kaba drecha i tin espasio sufisiente. E deseo ta pa e Boneriano mes hasi uso di e posibilidat ku tin awor na L.V.V.. Tin posibilidat tambe pa finansiamentu. Tin un proseso i regla ku mester sigui, momentu ku un persona tin un pida tereno na su disposishon. E hende mester ta aktivo riba e tereno”, Maurice Adriaens a bisa.

Bonaire Daily Fresh ta e promé empresa ku a haña un di e 12 terenonan di L.V.V.

Share This
error: Content is protected !!