KRALENDIJK – E famia di e hóben futbolista Jamison Sint Jago, den un informe e siman aki, ta partisipá ku Jamison Sint Jago a biaha pa Spaña djaweps 5 novèmber 2020.

Jamison a sali Boneiru ku e buelo di Divi Bon- Cur 3R219. Despues sigui Cur-Ams Tui OR 354 16.45. Despues di un stòp di 4 ora el a sigui pa Alicante/Spaña i despues ku destinashon final pa Murcia kaminda ku e ta bai forma parti di e tim segun e plan.

Jamison i su famia di kurason kier a gradisí tur ku di un òf otro forma a yuda i ketu bai ta yudando pa Jamison por logra su soño. E famia a organisá un atardi di enkuentro unda ku tur ku a deseá esei, por a pasa deseá Jamison bon biahe.

Un gradisimentu di kurason ta bai na Real Rincon U19 i Real Rincon Senior i tambe e “coach”nan, un tim kaminda ku Jamison a siña hopi.
Jamison ta hopi agradesido di por a forma parti di e famia di Real Rincon i Vespo te ku ultimo.

Nos ta kòrda manera awe unda ku pa promé bia riba e tópiko aki, nos a entrevista Jamison den programa, esaki despues ku a bira konosí ku e la keda skohí o sea di skout pa un tim di futbòl di Spaña. Si nos no ta kiboká, nos tabata e proménan ku a entrevista Jamison riba e oportunidat aki ku e la logra i ta bai p’e awó. Tabata Shahairo Oleana ku a duna nos e informashon i pone nos den kontakto e tempu ei ku Jamison.
Shahairo a trein Jamison e último simannan aki promé ku e biaha pa Spaña. Nos sa, manera e mes a bisa tambe, ku Jamison ta bai Spaña pa logra su soño i hasi esaki un realidat ku un karera briante den futbòl aya na Spaña. Awe henter Boneiru, spesialmente su hendenan i su amigunan di Rincon, su tim Vespo, ta mas ku orguyoso di e logro aki. Nos ta deseá Jamison tur, pero tur kos bon ku e buelo pa Spaña i tambe su karera den e deporte Rei futbòl aya na Spaña.
Éksito.

Share This
error: Content is protected !!