KRALENDIJK – USIBO a tuma nota di publikashonnan di prensa pa loke ta supuesto mal trato ku trahadónan ku ta ser poné na disposishon lo ta enkontrando pa loke ta nan kondishonnan di trabou. Komo ku ta trata di un kompania kaminda un di e miembronan di USIBO tin representashon, esta AFBW, mesora a tuma kontakto ku e dirigentenan pa atendé e asuntu aki. Primeramente a organisá un enkuentro entre USIBO, AFBW ku su shòpstuwartnan i gerensia di BWM pa depues reuní ku departamentu di asuntunan sosial i di labor di gobièrnu Ulandes, SZW. Tur e dos reunionnan a bai den un hopi bon esfera kaminda primeramente den un forma habrí BWM a duna tur informashon di e relashon di trabou ku nan tin ku e kompania ku ta pone e trahadónan na disposishon. Ku departamentu di Asuntuna Sosial i di Labor tambe e enkuentro tabata uno posiivo i habrí i konhuntamente a analisá e problema di “uitzendbureau” na Boneiru. E tema aki lo ta riba e agènda di e reunion mensual di USIBO pa djamars 3 di novèmber i e siguiente paso lo ta un reunion ku Bestuurscollege ku den esaki ta demonstrá negligensha pa ku su responsabilidat.

Posishon di USIBO.

Despues di a analisá e kaso USIBO a bai hasi su huiswerk i a enkontrá e lei ku ta regla ponemento na disposishon di trahadónan, e asina yamá “uitzendbureau”. E lei yama

Wet op het ter beschikking stellen arbeidskrachten BES

Na promé lugá nos tin ku wak e definishon ku e lei aki ta duna, e ta bisa tradusí na papiamentu.

“Pa aplikashon di e lei aki ta komprondé bou di “ponementu na disposishon di trahadónan lo siguiente :ponementu di trahadó na disposishon kontra pago na un otro, pa realisá labor koriente den e kompania di e otro”. Pues e konvenio di trabou ta entre e uitzendbureau i e trahadó ku ta pone esaki na disposishon di un otro kompania kontra pago”.

Artíkulo 2, insiso 1 di e lei ta bisa ku ta prohibí pa pone labor na disposishon sin un pèrmit di Bestuurscollege. Aki USIBO ta konstatá e prome punto ku mester bai na korigí. Nos

investigashon ta indiká ku nunka Bestuurscollege a apliká e lei aki, pues ken ku ta kon ku ta ta inskribí nan mes den Kámara di komersio i ta traha komo “uitzendbureau”. Esaki por krea e situashon ku ta hasi kiku ku ta ku e trahadó,

Den artíkulo 3 e lei ta stipulá ku pa medio di un ordenanza di lei ta stipulá tur dokumento ku ta rekerí pa duna e pèrmit i den e mesun artikulo 3 ta stipulá ku si den dos luna Bestuurscollege no duna e pèrmit e petishon ta ser konsiderá ku ela keda nengá.

Asina e lei aki ta atendé un kantidat di otro asuntu ku ta nesesario pa no tin abuzo ni eksplotashon di e trahadó(nan) ku ta keda poní na disposishon. Un di e sektornan ku meresé hopi atenshon ta e merkado di imigrantenan ku según nos informashon ta ser hopi maluzá pa e sistema aki. Un di e puntonan ku sigur USIBO kier atendé ku urgensia ku gobièrnu di Boneiru(esun ku ta duna pèrmit) ta ku mester kondishoná e pèrmit di tal forma ku kondishonnan laboral ku ta eksistí den e kompania pa su trahadónan fast òf k uta kai bou di CAO mester konta igual pa esnan ku ta keda poné na disposishon. Na di dos lugá gobièrnu di Boneiru mester laga su direktorado di supervishon i mantenshon keda enkargá ku kòntròl di e pèrmitnan aki, mientras ku departamento di asuntunan sosial i di labor su departamento di inspekshon laboral mester ta enkargá ku e supervishon, mantenshon i kòntròl di nos leinan laboral BES. Ideal ta pa e dos entidatnan aki forma un taskforce i huntu supervisá e kòntròl aki. USIBO ta haña ku no por ni mester pèrmití ku ta abuzá di trahadó den ningún forma. Asina e lei aki ta brinda un kantidat di posibilidatnan pa protehá e trahadó pero dor ku Bestuurscollege no a karga su responsabilidat den esaki a krea situashon indeseabel riba e merkado laboral.

Un biaha mas ta keda demonstrá ku trahadó mester bira konsiente ku e mester organisá su mes den un sindikato pa asina tin e protekshon kontra di abuzo. Ta den e sindikato lo duné informashon pa loke ta su derechonan pa asina e ta fuerte pará riba boka di trabou. Su debernan semper ta ankrá den su akuerdo di trabou, pero ta masha poko biaha dunadó di trabou ta informá su trahadó riba su derechonan. I den esaki sindikato tin e ròl importante. Pesei ta importante pa trahadonan inskribi nan mes komo miembro di un sindikato. Riba nivel di empresanan privá(no gobierno) tin diferente sindikato na kua e trahadó komo grupo i hasta komo individual por inskribí i bira miembro. Nos mester kue e baka awor na su kachu sino nos merkado laboral ta para bira un free for all ku tur abuso i eksplotashon di e trahadó.

Palabra i akshon ta na e trahadó ku ainda no ta organisá. Nos por hiba e kabai te na e boka di e pos pero nos no por obligé di bebe awa. Ta e mester sinti e nesesidat aki.

Share This
error: Content is protected !!