KRALENDIJK – Ta bai pone total 8 baki alrededor di Malekon pa por depositá shushi aden. Esaki ta loke Michael La Fortune a bisa Radio Live FM tokante un proyekto ku el a inisiá. Ya a pone un di e bakinan ku por depositá shushi, i ta bai pone mas durante 2021. “2 aña pasá mi a presentá e idea aki, pa krea diferente sitio pa hende por depositá shushi separá, alrededor di Malekon. Esaki a tuma poko tempu pa Selibon NV i gobièrnu di Boneiru pensa pa por aprobá e proyekto. Awor nan a tuma e desishon i tur kos ta aprobá pa ehekutá e idea. Tin awor spònser ku ta tras di e proyekto pa esaki bira un realidat.

A pone un bari pa depositá shushi, esaki komo muestra, i ta bin un kantidat di 8 mas. No ta simplemente un bari di shushi, sino e ta será den un baki bunita dekorá. For di Playa Pabou te na Chachacha Beach ta bai pone 8 bari, repartí den e área. E idea ta pa e hendenan ku ta kana den e área, tin un lugá pa por depositá shushi, evitá ku esaki ta bai laman i tur e konsekuensianan. Suidadanonan di Boneiru tabatin e oportunidat pa saka potrèt i a skohe esnan mas apropiá pa pone riba e kashi ku ta karga e bari di shushi. E sitio ku tin pa depositá shushi alrededor di Malekon, ta iluminá anochi, loke ta trese un bunita bista i pa e hende por nota unda tin lugá pa depositá shushi.    

E plan ta pa kada 2 aña ta hasi kambio di e potrèt riba e kashinan ku tin bari di shushi aden. Di e manera aki ta trese un kambio, kaminda ta duna oportunidat pa spònser nobo pone nan logo na e sitio. Selibon lo rekohé e sushi ku regularidat pa kontinuá ku e proseso di recycle. Pa fin di Yanüari 2021 e plan ta pa pone 3 mas di e sitionan pa depositá sushi separá na Malekon i asina sigui paso pa paso te momentu tin tur 8 instalá”, Michael La Fortune a bisa.

Share This
error: Content is protected !!