KRALENDIJK – Áwaseru ku durashon largu awe mardugá, a pèrkurá pa hopi problema na Boneiru. Ayera anochi a drenta e informashon, riba un posibel mal tempu ku ta bai pasa den e área di islanan Aruba, Boneiru i Kòrsou den ora di anochi pa mardugá. E mal tempu a forma i bini for di direkshon sùit (Venezuela), riba e islanan menshoná. Boneiru i Kòrsou a konstatá mas hopi áwaseru, kompaña pa bos, welek i bientu fuerte for di direkshon sùit. For di den oranan di mardugá por a nota diferente sitio ku a yená ku awa, loke a kousa hopi molèster. Por menshoná ku ta trata di e mesun kaya i áreanan den sentro di suidat ku semper tin inundashon. Entre otro e hanchi na altura di ‘Subway’, e kaya tabata yen yen di awa. No ta promé bia, sinembargo tur momentu ku áwaseru kai, tin molèster di awa na e sitio ku na dado momentu awa ta drenta den negoshinan den besindario. Por menshoná Kaya Soeur Bartola dilanti di hospital. Meskos ta e kaso na Kaya Pedro Luis Brion (Kaya di Banco di Caribe). Na Kaya General Carlos Manuel Piar, kantidat di awa ta akumulá i keda na e sitio. Tin sistema pa awa sirkulá, esta pasa di un sitio pa otro, ku no ta funshoná. Tur momentu ku áwaseru kai, e molèster di hopi awa den e mesun kayanan ta presentá. Aparte di kayanan ku tabata inundá, diferente notifikashon a drenta di kasnan aki na Boneiru ku a yena ku awa òf tabatin molèster di awa. Potrèt ta duna un bista di algun di e situashonnan ku problema di awa, despues di áwaseru.    

Share This
error: Content is protected !!