KRALENDIJK – Djaweps mèrdia alrededor di 1:15 sentral di polis a haña notifikashon ku un trùk a bòltu na altura di kaya Amsterdam. Na yegada di e promé patruya a konstatá ku riba e kaminda temporal ku a traha debí na trabounan ku ta tumando lugá pa konstruí un retònde, enberdat un trùk a bòltu riba su banda. A tuma nota tambe ku ya shofùr di e trùk a logra sali pafó di esaki. E shofùr a konta ku el a bai hala untiki na rant di e kaminda temporal pa duna espasio na un otro vehíkulo pa pasa den su banda, pero a nota kon tiki tiki a trùk a kuminsá kèntel i a bòltu. E tera tabata moli debí na yobida fuerte di último anochi. Ambulans a presentá na e sitio pa un chekeo médiko riba e shofùr i e no mester a bai hòspital. Algun ratu despues a saka tur e greis for di e trùk i ku yudansa di un otro ekipo a bòltu esaki bèk. Daño material ta konsiderabel na e trùk. CRS a presentá pa registrá e aksidente aki.

Un súplika ta bai na tur shofùr di kualkier ekipo pisá pa uza un otro ruta i evitá di pasa e sitio kaminda ta konstruí un retònde aktualmente.

Share This
error: Content is protected !!