KRALENDIJK – Aña pasá FLTD a kuminsá un proyekto piloto pa regalá kashi di buki ku buki na 12 krèsh. Pa e proyekto aki a aserká MBO ku e petishon pa laga studiantenan di departamentu di karpinté traha 12 kashi di buki pa por regalá 12 krèsh. FLTD mes a kumpra e palunan ku ta nesesario pa por a traha e kashinan.

E trahamentu di kashi a bira un proyekto pa e studiantenan di MBO. E studiantenan ta bou di guia di mener Martijn Babtiste.

E aña aki e proyekto ta ser finanansiá pa Wings of Support di KLM. Ku e sosten finansiero grandi aki, nos por a kumpra material pa traha e kashinan i bukinan nobo pa e kreshnan tantu esunan di aña pasá komo esunnan di e aña aki lo risibí un tas yen di buki nobo skibí pa outornan lokal. Entre otro Denise de Jong, Linda Coffie, Morela Warner i Katy Thielman.

Durante siman di buki for di 9 di novèmber te ku 12 di novèmber, e studiantenan i representantenan di FLTD a entregá e kashinan i bukinan na e 12 krèshnan.

E intenshon di e proyekto aki ta pa siña i stimulá nos muchanan lesa for di edat hopi yòn. Tambe pa motivá lidernan di krèsh pa lesa mas tantu ku e muchanan p’asina nan por lanta ku amor pa lesa i sigui desaroyá positivamente.

Dia 12 di novèmber a entregá e último kashi di buki i bukinan na NSO ‘Bright and Happy Kids’. Ta trata di un akohida pa mucha situá den e área di kaminda nieuw amsterdam z/n. Eileen Croes – Piar, presidente di ‘Fundashon Lesa ta Dushi’, a papia durante e momentu i a splika tokante e kashi i buki ku nan a entrega e skol. “’Fundashon lesa ta dushi’ tin un proyekto i huntu ku MBO ta pasando na tur akohida pa mucha stap pa stap, pa pone un kashi di buki na e skol. E aña aki 12 akohida pa mucha a haña un kashi ku buki. Den kuadro di siman di buki, ‘Fundashon Lesa ta Dushi’, ku e meta ta pa promové i stimulá muchanan di edat entre 4 pa 12 aña pa nan lesa. Ta importante pa lesa, loke ta hasi e mucha sabi. E idea ta pa poulatinamente sigui pone mas buki den e kashi pa tur mucha tin buki pa lesa. E meta ta pa tur skol tin un kashi yená ku buki pa muchanan lesa”, Eileen Croes- Piar.           

Liset de Keijizer direktor MBO, a bisa ku ya ta di 2 aña ku e proyekto ta kanando, loke ta hopi importante. “MBO ta traha huntu ku ‘Fundashon Lesa ta Dushi’. Ta un plaser pa mira kon entusiasmá e muchanan ta ku yegada di e kashi ku buki aden. Ta importante pa e bukinan ta na idioma papiamentu i hulandes. 2021 ta kontinuá pa asina hasi mas mucha di otro skol, kontentu ku buki pa lesa”, Liset de Keijizer.  

Direktiva di Fundashon Lesa Ta Dushi ta sumamente agradesido na Wings of Support i MBO-SGB ku nan gran aporte pa realisashon di e proyekto inportante aki.

Share This
error: Content is protected !!