KRALENDIJK – Nos ta den luna di Novèmber i un di e tradishon nan mas grandi ta fiesta di Sanikolas. Lamentablemente e fiesta aki no ta sigui mas. A bini ku un lamunchi zür den forma di bai virtual. Loke ta mas negativo ku tur e bòmbòshi ku zwarte piet ta rasismo.

Mi ta komprondé ku no por drai bèk e desishon pero si e fiesta aki ta fiesta pa mucha, a splika e muchanan ken ta zwarte piet?, kiko ta rasismo? Si ta rasismo, splika kiko ta rasismo? Zwarte Piet no tin nada di aber ku kolonialismo, sklabitut i rasismo. A plak e konseptonan; kolonialismo, diskriminashon, sklabitut i rasismo riba e figura zwarte piet sin konosé historia di e figura zwarte piet. A splika kiko ta kolonialismo ? Ta tende ku Sanikolas ta un hòmber santu ku ta parti regalo solamente pa e muchanan bon mucha. Nunka a puntra ku no ta e hòmber santu ta diskriminá? E punto ta, ku religion katóliko a kohe un tradishon no kristian pone su stèmpel ariba.

Dikon nos ta adorá Kuifje, spesial Kuifje in Afrika i Arendsoog ku Witte Veder?. Dikon ta selebrá Maskarada sin ningun problema. E bistínan di zwarte piet i di e maskanan no ta paresido ? Ken por mustra pa medio di dokumentunan di historia ku zwarte piet tabata un katibu òf usá komo katibu? Tin demasiado literatura tokante zwarte piet i maskarada ku ta tira un otro lus riba e fiestanan di Sanikolas i Maskarada. Mester buska e bèrdat i no implantá rabia riba un figura ku no tin nada di aber ku sklabitut i diskriminashon.

E bagamunderia di mas grandi tabata e idea pa no pinta e kara pretu pero bini ku diferente koló. Ta kuantu koló hende tin.? Tin hende koló bèrdè, püs, oraño? Mi tin tres sugerensia. Unu, profundisá den historia di zwarte piet. Di dos mantené e fecha sinku di desèmber komo un tradishon i selebrá den seno familiar. Di tres Gobièrnu parti e paketenan pa e trahadónan riba sinku di desèmber i laga esnan ku no a kumpli bai kas man bashí.

Mi speransa ta pa otro aña nos selebrá fiesta di Sanikolas manera sèmper ku Pietnan pretu pretu.

Arthur Sealy

Share This
error: Content is protected !!