KRALENDIJK – Djabièrnè anochi, alrededor di 11:15 sentral di polis a risibí notifikashon ku un aksidente di tráfiko a kaba di tuma lugá enfrente di antes Caribbean Fasteners riba Kaya Nikiboko Nort i ku tin herido. Na yegada di e promé unidat polisial a bin topa un hòmber bentá riba kaya i un jeep koló pretu ku un skuter pegá bou di dje. For di un investigashon preliminar ku a hasi na e sitio a bin sali na kla ku e skuter tabata biniendo for di Playa, pa subi Kaya Nikiboko Nort. E jeep tabata bayendo direkshon di Playa pa kita na su man robes pa subi e sitio di stashoná outo patras di misa San Bernardo. Shofùr di e jeep a lora i no a mira e skuter i alkansé. E shofùr di e skuter a kai i e outo a pasa riba dje, lastrando e skuter bai kuné. Ambulans a presentá rapidamente na e sitio pa atendé ku e hòmber shofùr di e skuter ku tabata keha di basta doló. A transportá shofùr di e skuter urgente pa hòspital pa tratamentu médiko. CRS tabata presente i a registrá e aksidente.

Share This
error: Content is protected !!