KRALENDIJK – Djadumingu alrededor di 2:45 di atardi sentral di polis a risibí notifikashon ku mester tin un kantidat di gasòil bashá riba kaminda for di den besindario di Kaya Aruba na altura di Panaderia Alma lusa te ku Kaya L.D. Gerharts na altura di antes Giro Bank. Mesora un patruya a akudí i a sera diferente kaya na vàrios parti den Playa pa evitá kualkier konsekuensia ku esaki por tin kuné. Brantwer i personal di Directie Ruimte en Ontwikkeling (DROB) tambe a akudí na e sitio. A manda pidi un loader pa basha santu riba e gasòil pa despues kita e santu bèk. Un trabou basta grandi mirando e kantidat di gasòil ku tin riba kaminda i e distansia.

KPCN ta pidi outomobilistanan pa evitá di hasi uzo di Kaya L.D. Gerharts i Kaya Grandi te ku Kaya Aruba. Esaki pa evitá fila komo ku e kayanan ta será te ora finalisá e trabounan di limpiesa. No ta konosí ken a kousa esaki ni kon el a sosodé. Ta pidi esun ku a kousa esaki i no a mèldu departamentunan konserní di e situashon, pa mèldu su mes na warda di polis. Ta bai wak tur kamara di seguridat den bisendario pa sa ken a kousa esaki. Investigashon ta andando.

Share This
error: Content is protected !!