KRALENDIJK – Hopi ta esnan ku tur aña di nobo durante luna di Novèmber i dezèmber ta disfrutá di e alegria ku e fiesta tradishonal di tur mucha ta trese, kaminda nan ta konsiente ku bon komportashon lo keda premiá. Tambe e fiesta aki ta enkurashá otro muchanan pa nan komportashon ta mihó. Komishon Sanikolas Boneiru ku for di 2017 ta sòru pa Sanikolas i su ayudantenan yega Boneiru sano i salvo, a tuma nota riba retnan sosial ku tin hopi prekupashon pa ku yegada di e hòmber Santu i su ayudantenan na Boneiru e aña aki. E impakto di Covid-19 a sòru pa hopi kontratempu pa loke ta trata fiestanan kultural tradishonal ku no por a sigui, entre otro selebrashon di yegada di Sanikolas. Pero pa kita tur mal komprondementu ku ta sirkulando, ‘Komishon Sanikolas Boneiru’ ta aklará tur posibel mal komprondementu.

Manera ta konosí, e yegada di Sanikolas na waf Chicu Mercelina i e fiesta grandi di yegada di Sanikolas ku último añanan tabata wòrdu organisá riba e sitio di stashoná outo patras di Misa di Playa tabata tin un multitut di riba mil (1000) persona ku tabata bin gosa di e fiesta di mucha aki. P’esei Entidat Públiko Boneiru a disidí pa no laga e fiesta di yegada di Sanikolas tuma lugá e aña aki pa evitá plamamentu di e vírùs di corona den e evento públiko grandi aki. Pero esaki no a stroba Sanikolas pa bini Boneiru i hasi kada un mucha kontentu. Komishon Sanikolas Boneiru a prepará un boletin informativo [Notipit] kombertí den un storia pa mucha ku lo pasa na kanalnan di televishon lokal i media sosial.

Sanikolas i tur su ayudantenan ya tin algun dia kaba na Boneiru, pero ta den karentena. Ainda nan no por bishita ningun kas òf establesementu. Si tur kos bai bon, Sanikolas i su ayudantenan lo haña pèrmit di gezaghèber i Diputado Nina den Heyer pa sali for di karentena dia 20 di novèmber pa 7’or di anochi. E dia ei nan lo ta kla pa saludá tur mucha. Durante karentena, Sanikolas a enkargá e pitnan pa hasi grabashon i kompartí esaki pa tur hende por mira kon nan ta pasa den karentena na Boneiru.

E programa a keda produsí pa Ray Production, ku un storia skirbí pa Marjolijn Kroon i Raynel Cecilia. E programa lo keda presentá pa Tio Tony Angila i Tante Saily i lo dura 5 dia largu kuminsando djaluna 16 di novèmber te ku djabièrnè 20 di Novèmber. Muchanan i nan mayornan por mira kon Komishon Sanikolas Boneiru a prepará pa trese e Hòmber Santu Boneiru. Tambe den e grabashonnan por mira kon Sanikolas a yega Boneiru ku boto i kon e ta bai e sitio di karentena manera kualke otro turista ku bini for di un Pais di riesgo haltu. Banda di e yegada den e normal nobo, lo por mira tambe e aventuranan ku Sanikolas i su ayudantenan ta pasa aden durante karentena. MCB i Lito, e amiguito di tur mucha ta invitabo pa sintonisá e boletin di Sanikolas [Notipit] kuminsando djaluna awor 16 di novèmber pa djabièrnè 20 di novèmber. 6’or di atardi na DC TV, 6:45 di anochi na NosTV i riba e página di Facebook di Radio Live 99.9 FM pa 7’or di anochi.  

Tambe Komishon Sanikolas Boneiru a haña konfirmashon ku tur fiesta privá por sigui manteniendo reglanan di EBT. Ta pèrmití pa 25 hende pa ta presente na un enkuentro den seno privá. Por menshoná ku a sobra solamente algun espasio mas den e agènda di Sanikolas. Pa tur ku ta interesá pa Sanikolas i su ayudantenan pasa na kualkier kas, akohida di mucha, skol òf kualke negoshi den seno chikitu por tuma kontakto ku Selimah Agostien i Tino de Palm na +599777-8875 òf +599788-8678.

Share This
error: Content is protected !!