KRALENDIJK – Dia 15 di novèmber pa di kuater biaha ta selebrá Dia Mundial pa Pobernan. E mensahe di Papa Fransisco ku e lema di e aña aki: Sea generoso ku hende pober ( Sirag 7:32), saka man i yuda e pobernan. E lema di e aña aki ta invitá nos pa saka un man i yuda nos próhimo den nesesidat. E ta enkurashá nos pa karga e peso di esunnan mas vulnerabel. Di e forma aki nos ta kumpli ku e palabranan di San Pablo: pa via di amor sirbi otro. Pasobra por resumí henter Lei di Moises den esun mandamentu akí: ‘Stima bo próhimo manera bo ta stima bo mes. (Galatanan 5:14). Apostelnan ta siña nos ku libertat ofresé via e morto i resurekshon di Hesus Kristu ta hasi nos individualmente responsabel pa sirbi otro, espesialmente esunnan di mas vulnerabel. Esaki no ta un opshon pero mas un siñal di un fe auténtiko ku nos ta profesá.

E buki di Sirag por yuda nos den esaki. E ta sugerí maneranan konkreto pa duna aporte na esunnan mas vulnerabel. E ta bisa nos pa duna simpatía na esunnan ku ta den doló. No faya ku esun ku ta yora. (Sirag 7:34). E temporada di e pandemia aki a forsá nos pa tene isolashon estrikto, hasiendo imposibel pa mira i konsolá nos amigunan i konosírnan den nan pena di a pèrdè nan ser kerínan. Den Sirag nos ta lesa tambe pa no keda sin bishitá esunnan ku ta malu (Sir. 7:35). Pero nos no tabata apto pa tabata serka esunnan ku tabata sufri, i na mes momentu nos a bira mas konsiente kon frágil nos mes bida ta. E palabra di Dios no ta pèrmití pa satisfakshon propio, E ta empuhá nos kontinuamente pa aktua ku amor.

Den e trayekto di enkuentro ku e pobernan diariamente, laga nos saka nos man i yuda nos próhimonan den nesesidat. I no dis rèk man so pa atendé ku nos kòmpiuter, tèblet i telefón. No laga nos ta indiferente, hasta un smail ta duna alivio na esnnan mas vunerabel. No laga nos pensa ku ayudo na nos vulnerabelnan ta responsabilidat di otro. Un yamada pa nos ban den orashon pa asina move mas hende den nos komunidat pa saka man i duna un ayudo na esunnan den mas nesesidat den nos komunidat. Caritas Boneiru lo dediká un dia spesial na esunnan mas vulnerabel den nos komunidat.

Share This
error: Content is protected !!