Kralendijk – Awor ku e kantidat di kaso di hende ku a pega ku e vírùs di COVID-19 ta kedando abou, nos por sigui suavisá e reglanan manera menshoná den e ordenansa di emergensia aktual, di fase 3, menasante, pa fase 2, preokupante. Esaki ta loke gezaghèber di Boneiru Edison Rijna a bisa fin di siman ku a pasa. El a sigui bisa: “Tin algun kambio ku a tuma lugá kaba, manera e regla ku establesimentu di hóreka i kasino por sera mas lat. Otro kambio ku a tuma lugá ta e kambio di kódigo oraño pa kódigo hel. 

E último dianan akí a bini 3 kaso nobo ku a pega ku e vírùs aserka. Ta bon pa nos tene kuenta ku awor ku mas hende por bini Boneiru, nos lo por haña mas tantu kaso di COVID-19. Nos no mester kere ni spera, ku nos por mantené e situashon kaminda tin sero kaso di hende ku a pega ku e vírùs. Esei no ta realista.  

Nos mester kustumá ku loke ta importante pa nos tin e vírùs dominá. Nos no mester lubidá ku nos ta bon prepará. Nos a demostrá ku nos por esei kaba. Nos lo tin temporada ku algun òf basta kaso di COVID-19 na Boneiru i otro temporada kaminda nos no tin niun kaso.  

Nos komo pueblo mester kustumá pa adaptá, esun biaha na situashon kaminda tin regla estrikto, i adaptá otro biaha na regla mas suave. Di nos parti lo sòru pa e kambionan no ta drástiko i ekstremo. Di otro banda mi ta konta ku boso koperashon, pa boso mantené boso na e reglanan i medidanan.

Mi por imaginá mi mes ku nos tur ta trahando plan kaba i preparando pa selebrá e dianan di fiesta huntu ku nos famia i amistatnan. Laga nos tur para ketu kon nos por hasi esei teniendo kuenta ku e reglanan eksistente. No laga nos lubidá òf neglishá e reglanan básiko den dianan di fiesta. Nos niun no ke pa ora aña bòltu nos haña un brote nobo. Mi ta spera ku nos tur por pasa dushi dianan di fiesta i habri aña salú.” 

Share This
error: Content is protected !!