KRALENDIJK – Djabièrnè 13 di novèmber alrededor di mitar di diesun di anochi, dos outo a mishi ku otro den Kaya Grandi. Esaki a sosodé nèt dilanti di ofisina di UTS. Manera ta e prosedura, mester tuma kontakto ku CRS pa atendé asuntunan di seguro. Poko despues personal di CRS a presentá na e sitio pa atendé ku e aksidente, kaminda a resultá ku ámbos vehíkulo ku a mishi ku otro, a keda bon sin niun daño material. Simplemente nan a pega na otro.  

PERSONAL DI CRS DEN PROBLEMA KU HULANDES EUROPEO 

Despues ku e personal di CRS a kaba atendé ku e aksidente, el a subi su vehíkulo pa bandoná e sitio. Debí ku el a drenta Kaya Grandi for di direkshon kontrario, e mester a bai ku poko kuidou pa e sali bèk for di kaya Grandi. E momentu ei un djip manehá pa un Hulandes Europeo a kuminsá dirigí palabra fuerte den direkshon di e personal di CRS. Entre otro pa move rápido pa tráfiko por sigui. E hòmber basta furioso, a subi alsera ku su djip dilanti di ‘Littmans Jewelers’, pa e por pasa e vehíkulo di CRS. Na momentu ku el a logra pasa e vehíkulo di CRS, el a wanta brek i blòkia e vehíkulo di CRS nèt dilanti di kaminda ántes tabata ‘Julius Place’. Aki e vèn di CRS a alkansá e djip ku e Hulandes Europeo tabata manehá. E Hulandes Europeo a baha for di su djip bai furiosamente i a kibra e glas den banda patras di e vèn di CRS ku su man. Despues el a subi e djip, huntu ku un señora sintá na banda, i a kore bai. Shofùr di e bùs di CRS a sigui su tras mesora i a yama polis tambe i algu mas lat a detené e hòmber di inisial J.K.E.K. di 56 aña di edat riba Kaya Gilberto F. Betico Croes enkonekshon ku destrukshon.

Share This
error: Content is protected !!